SHBA-ja do ta bëjë Serbinë Palestinë nëse Beogradi nuk e pranon planin e Perëndimit për Kosovën. Vrasja e 60 palestinezëve nga Gaza ishte ushtrim demonstrues për të gjithë ata që i kundërvihen interesave të SHBA-së.
Kështu nis shkrimi më i fundit i mediumit Sputnik. Aty citohet Liljana Smajlovic, ish-kryeredaktore e gazetës serbe Politika, e cila në Serbi vlerësohet si njohëse e mirë e politikës së jashtme amerikane, përcjell GazetaMetro.net.
Ajo thotë se Washingtoni nuk do t’i vërë formalisht sanksione Serbisë dhe se nuk do të ketë ndonjë sulm të ri ushtarak mbi vendin, por rasti i fundit në Gaza tregon sjelljen ndaj atyre që i kundërvihet interesave të Perëndimit, raportojnë mediat serbe.
“Nuk besoj se do të ketë çfarëdo lloj sanksionesh, nëse deri në fund të vitit nuk e pranon zgjidhjen për Kosovën e cila i konvenon Washingtonit dhe Brukselit. Megjithatë, ajo çfarë ndodhi me zhvendosjen e ambasadës së SHAB-së në Jerusalem… është ushtrim demonstrues çfarë të ndodhë nëse e kundërshton ndonjë interes të rëndësishëm të fuqive perëndimore”, ka thënë Smajloviq.
Sputnik shkon edhe më larg duke cituar analistin Dragomir Andjelkoviq, që thotë se ekziston rreziku real i një “goditjeje amerikane” ndaj Serbisë, para së gjithash për një sulm mbi serbët e Kosovës.
Andaj, sipas tij, Serbia duhet të mbështesë atë që e quan vetorganizim përmes organizatës Civilna Zastita.
“Ajo u hoq përkohësisht për shkak të Bashkimit Evropian, por duhet të ribëhet urgjentisht sepse edhe ashtu do na duhet në të ardhmen…”, thotë Andjelkovic.
