Bota

Shpronësimet e palestinezëve nga Jeruzalemi mund të përbëjnë krime lufte

Human Rights Watch tha të martën se Izraeli kishte zhveshur rreth 15,000 palestinezë nga Jeruzalemi nga e drejta e tyre për të jetuar në qytet që nga viti 1967, dhe paralajmëroi se ky mund të jetë një “krim lufte”.

“Izraeli pretendon ta trajtojë Jeruzalemin si një qytet të bashkuar, por realiteti është një grup rregullash për hebrenjtë dhe një tjetër për palestinezët”, tha në një raport Sarah Leah Whitson, drejtoreshë e HRË në Lindjen e Mesme.

Izraeli e pushtoi Jeruzalemin lindor gjatë Luftës Gjashtë Ditore të vitit 1967, në një lëvizje që asnjëherë nuk u njoh nga bashkësia ndërkombëtare.

Më shumë se 300,000 palestinezë kanë statusin e qëndrimit të përhershëm, por nuk janë shtetas izraelitë.

Ndërsa banorët e Jeruzalemit Lindor lejohen të aplikojnë për shtetësi, shumica nuk e bëjnë sepse e shohin atë si njohje të sovranitetit të Izraelit.

Që nga viti 1967, 14,595 palestinezëve u është hequr statusi i tyre rezidencial, duke mos i lejuar ata të qëndrojnë në qytetin e tyre të lindjes, tha raporti i HRW duke cituar shifrat e ministrisë së brendshme.

Shumica e këtyre revokimeve ishin për shkak të periudhave të kalimit të kohës jashtë qytetit, kështu Izraeli argumenton se “qendra e jetës së tyre” nuk ishte në Jeruzalem.

“Dëbimi ose transferimi i detyruar i çdo pjese të popullsisë së një territori të pushtuar mund të përbëjë krim lufte”, tha raporti.

Zëdhënësja e ministrisë së brendshme izraelite nuk ka komentuar rreth tij. / © Gazeta Impakt

OPINIONE