Përfaqësuesja e Lartë e Bashkimit Evropian për Politika të Jashtme dhe të Sigurisë, Federica Mogherini, lidhur me planin e Bashkisë së Jeruzalemit të administruar nga Izraeli për taksimin e kishave, tha se Jeruzalemi është qytet i shenjtë për tri fetë, duke theksuar shpresën që çështje të zgjidhet sa më parë.
“Shpresojmë se sa më shpejtë do të gjendet një zgjidhje për këtë. Jeruzalemi është një qytet i shenjtë për të tri fetë”, tha Mogherini në një konferencë të përbashkët për media në Bruksel me ministrin e Punëve të Jashtme të Jordanisë, Ayman Safadi.
Përfaqësuesja e lartë njoftoi se sot me ministrat e Punëve të Jashtme të shteteve arabe të cilët ndodhen në Bruksel dhe me Sekretarin e përgjithshëm të Unionit Arab Ahmed Ebu Gajt do të diskutojnë lidhur me procesin e paqes në Lindjen e Mesme.
Duke folur për zhvillimet mes Izraelit dhe Palestinës, Mogherini tha se janë pranë zgjidhjes me dy shtete me kryeqytet Jeruzalemin dhe shtoi se të gjitha vendbanimet izraelite janë ilegale.
– “Jeruzalemi duhet të bëhet simbol i paqes”
Nga ana tjetër, ministri i Punëve të Jashtme i Jordanisë, Safadi, shprehu kënaqësinë e tij për takimin e Unionit Arab dhe të BE-së, duke shtuar se bota arabe ka rënë dakord që vendimi i SHBA-ve për njohjen e Jeruzalemit si “kryeqytet të Izraelit” është jashtëligjor.
Duke theksuar se është duke vazhduar mbështetja e fortë dhe e palëkundur e botës arabe për paqen e përhershme dhe gjithëpërfshirëse, Safadi tha se kjo paqe mund të arrihet vetëm me zgjidhjen dyshtetërore, ku Jeruzalemi Lindor do të jetë kryeqyteti i Palestinës.
“Jeruzalemi duhet të bëhet simbol i paqes. Për fat të keq, kjo nuk është e mundur përderisa Kudsi mbahet nën okupim dhe peng i frikës dhe dëshpërimit”, thotë Safadi.
Duke rikujtuar se Kisha e Varrit të Shenjtë në Jeruzalem pas më shumë se një mijë vite është mbyllur për herë të parë me qëllim të reagimit kundër planit të komunës izraelite të Jeruzalemit për t’i taksuar kishat dhe pasuritë e patundshme të këtyre kishave, Safadi tha se “Ky vendim është thirrje për të vepruar kundër vendimeve të paligjshme dhe të njëanshme të Izraelit”.
