Rajoni

“Shumë shpejt në qendër të Prishtinës do të ndërtohet një sinagogë”, premton politikani i Kosovës

Me rastin e 70-vjetorit të krijimit të shtetit zionist të Izraelit, sot në Kosovë u organizua një event nga Bashkësia Hebreje “Best Israel Kosova”. Kryetari i Kuvendit të Kosovës Kadri Veseli, i pranishëm në këtë organizim ka thënë se në të ardhmen, Kosova dhe shteti i Izraelit do të thellojnë bashkëpunimin në mes vete.
Kryetari i kësaj bashkësie, Ruzhdi Shkodra, ka thënë se këtë përvjetor e bënë më madhështor pikërisht pasi në këtë ditë, Shtetet e Bashkuara kanë hapur ambasadën në Jerusalem, pasi Uashingtoni më herët gjatë këtij viti, e njohu Jerusalemin si kryeqytet të Izraelit. Ndërkohë,  nuk u tha asnjë fjalë nga të pranishmit për vrasjen e palestinezëve të pafajshëm nga snajperat e ushtrisë zioniste.

Ndër të tjera, Shkodra ka kërkuar nga kryetari i Kuvendit, Kadri Veseli që të ushtrojë autoritetin e tij tek institucionet kompetente për ndërtimin e një sinagoge në Prishtinë.

Veseli, ndërkaq, ka premtuar se shumë shpejtë në qendër të Prishtinës do të ndërtohet sinagoga e re, “në mënyrë që edhe qytetarët hebrenj të kryejnë ritet e veta në mënyrë dinjitoze në shtetin e Kosovës”.

Në Prishtinë, deri në vitin 1963, ka qenë Sinagoga e Prishtinës në lokacionin në mes ndërtesës se Qeverisë dhe Kuvendit të Kosovës.

Pikërisht në këtë lokacion, në shenjë përkujtimi për hebrenjtë e Kosovës që u zhdukën në kampet e nazistëve gjatë Holokaustit, tashmë është ngritur një memorial, në të cilin shkruan :“Populli i Kosovës nuk do t’i harrojë kurrë”.

OPINIONE