Duke publikuar një videoklip, Arnold Shvarzeneger kritikoi ashpër qëndrimet përkrahëse të presidentit amerikan Donald Trump për grupet raciste dhe neonaziste në Virxhinia.
Ai në këtë klip e fton presidentin Trump të hulumtojë më shumë në lidhje me nazistët. Në fillim, Donald Trump kritikoi manifestimin e neonazistëve dhe grupeve raciste në Charlottville, por një ditë pas këtij manifestimi, u tërhoq nga ky qëndrim dhe deklaroi se edhe racistët, edhe kundërshtarët e tyre ishin fajtorë për trazirat. Në videoklipin e tij, Arnold Shvarzeneger thotë: “Nuk ekziston ektremizëm në të dyja palët. Nuk ekziston urrejtja në të dyja palët. Nëse ti manifeston nën një flamur që simbolizon vrasjen e miliona njerëzve, ti je urrejtës, racist dhe ekstremist. E vetmja rrugë për tu përballur me zërat e urrejtjes është zëri më i fuqishëm i logjikës dhe tolerancës”. Ish guvernatori i Kalifornisë e këshillon Donal Trumpin që mesazhin e tij të ardhshëm t’a përpilojë kështu: “Si president i SHBA dhe si një republikan, hedh poshtë çdo përkrahje për idenë e supremacisë së racës së bardhë. Vendi, ushtria e të cilit triumfoi ndaj ushtrisë së Hitlerit, nuk është vendi i duhur për valëvitjen e flamurit të nazistëve. Partia e Abraham Linkolnit nuk do të përkrahë ata që mbajnë flamurin e luftës së humbur të Konfederatës”. Në përfundim të videoklipit të tij, Shvarzeneger thotë: “ Askush nuk lind me ide plot urrejtje, prandaj nuk është vonë të mësojmë se çdo njeri ka vlerë të barabartë me njerëzit e tjerë”./ PT
