Në një prej komenteve të tij në rrjetet sociale presidenti amerikan Donald Trump ka përshkruar sot protestuesit e aramtosur në Michigan si “njerëz shumë të mirë” dhe sugjeron se governatorja duhet t’i dëgjojë e të bjerë në marrveshje.
Dje qindra protestues, shumë prej të cilëve të armatosur rëndë, hynë në selinë e guvernatores demokrate Gretchen Whitmer për të kundërshtuar me forcë urdhërin e saj për zgjatjen e karantinës së koronavirusit me dy javë të tjera, deri në 15 maj.
Komenti i Trump ishte: ” Guvernatorja e Michigan duhet të lëshojë pak, për të shuar zjarrin. Ata janë njerëz të mirë por janë të zemëruar. Kërkojnë t’u kthehet jeta e tyre në mënyrë të sigurtë. Takoji ata, diskuto, bëj marrveshje”.
Nuk është e qartë se kujt po i referohej Trump në fjalët e tij. Megjithse Whitmer ka lëshuar urdhrin e zgjatjes së masës, ajo ka zbutur disa nga kufizimet e urdhrit fillestar.
Rezidentët e Michigan duhet të ndjekin rregullat e distancimit social por tashmë lejohen të lëvizin mes shtëpive të para e të dyta dhe të shkojnë për të dalë me barkë ose për të luajtur golf.
Michigan është një nga shtetet e goditura më rëndë nga COVID-19 dhe deri dje raportonte më shumë se 41 000 të infektuar e rreth 3800 vdekje.
Protestuesit kanë demonstruar kundër masave kufizuaese në disa shtete të SHBA por protesta e djeshme ishte shembulli më i qartë i hyrjes së tyre në një legjislaturë lokale, me armët e tyre në krahë.
Trump ka shprehur gjithmonë mbështetje për protesta të tilla në shtete të ndryshme amerikane./tch
