Bota

Turqia dënon propagandën terroriste të PKK/YPG/PYD-së në Parlamentin Evropian

Ministria e Punëve të Jashtme theksoi përmes një komunikate të shkruar se në një aktivitet skandaloz që u mbajt të mërkurën (5 shkurt 2020) në Parlamentin Evropian, Turqia dhe Presidenti Recep Tayyip Erdogan u kërcënuan në mënyrë të padrejtë; si dhe u bë propagandë terroriste me pjesëmarrjen edhe të kryeterroristëve dhe mbështetësve të organizatës terroriste PKK.

“Lejimi i pseudodrejtuesve të PKK-së, e cila është regjistruar si një organizatë terroriste nga Bashkimi Evropian gjithashtu, të marrin pjesë në një aktivitet në Parlamentin Evropian dhe të propagandojnë terrorizmin në të, do të thotë mbështetje e hapur për terrorizmin.

Ne e dënojmë me forcë këtë aktivitet jozyrtar, i cili gjithashtu shpërfill parimin e kundërveprimit ndaj organizatave terroriste pa bërë dallim.

Lejimi i këtij aktiviteti shkel Direktivën e BE-së nr. 2017/541 mbi Luftimin e Terrorizmit dhe vendimin e Byrosë së Presidencës së Parlamentit Evropian më datë 2 tetor 2017; kështu që bie ndesh me parimet e BE-së.

Nga ana tjetër, është vërejtur se aktvendimi i padrejtë i Gjykatës Supreme të Belgjikës në lidhje me «Çështjen Ariadna» ka inkurajuar qarqe të caktuara brenda Parlamentit Evropian për të mbështetur terrorizmin. Ne presim që Belgjika të kryejë punën e nevojshme legjislative pa vonesë në mënyrë që të prishë vendimin e lartpërmendur dhe të bashkëpunojë me Turqinë në luftën kundër terrorizmit.

Ne u bëjmë thirrje institucioneve dhe shteteve anëtare të BE-së që tashmë të mbajnë qëndrim të vendosur kundër organizatave terroriste dhe të heqin dorë nga dhënia e përkrahjes terroristëve”, thuhet në komunikatën e MPJ turke.

Konferenca me temë “Bashkimi Evropian, Turqia, Lindja e Mesme dhe Kurdët”, organizuar për të 16-tën herë nga PE-ja në kryeqytetin Bruksel të Belgjikës, u shndërrua në platformë propagandistike të organizatës terroriste separatiste PKK.

Pjesëmarrës në këtë konferencë ishin edhe disa kryeterroristë të organizatës separatiste në Evropë, të cilët kërkohen me buletin të kuq./trt

OPINIONE