Vazhdojnë dorëheqjet nëpër bashkitë e vendit pas ultimatumit të dhënë pak ditë më parë nga kryeministri Rama për ‘rifreskim’ të këtyre institucioneve.
Edhe bashkia e Roskovecit është përfshirë në një ristrukturim të brendshëm pas urdhrit të kryeministrit Edi Rama. Burime nga PS në qarkun e Fierit bëjnë me dije se prej dy ditësh, drejtorët e bashkisë dhe 5 administratorë kanë nisur të dorëzojnë dorëheqjet te kryebashkiakja Majlinda Bufi.
Reforma në administratë pritet që të përfshijë edhe bashkitë e tjera të vogla si Mallakastra, Patosi e Divjaka.
Kujtojmë që një ditë më parë pati largime masive edhe në zona të tjera të vendit. Në Selenicë u dorëhoqën 5 kryetarët e Njësive Administrative. Largime u raportuan edhe në bashkinë e Vaut të Dejës, ku dorëzuan pranë kryebashkiakut Kristian Shkreli dorëheqjet 2 zëvendës kryetarët e bashkisë, 5 administratorë dhe drejtorët.
Në Lushnje, një ditë më parë u dorëhoqën, 13 drejtorët e bashkisë, 10 drejtues të Njësive Administrative si edhe 5 drejtues të tjerë. Në Krujë u dorëhoqën gjithashtu administratorët e 5 Njësive, 2 nënkryetarët e bashkisë dhe drejtuesit e drejtorive.
“Furtunë” pati edhe në qarkun e Dibrës, ku 35 drejtues të Njësive Administrative dorëzuan dorëheqjet.
Një aksion i tillë, i njoftuar nga kryeministri Edi Rama, ka për qëllim ‘rifreskimin’ e këtyre institucioneve.
Edhe Laçi është ‘prekur’ nga vala e dorëheqjeve pas ultimatumit të kryeministrit Edi Rama.
Mësohet se kanë dorëzuar dorëheqjet kryetarët e tre Njësive Administrative./Shqiptarja
