Rajoni

Vjen kundërshtimi i parë nga një parti shqiptare për emrin e propozuar për Maqedoninë

Lëvizja Besa në Maqedoni, thotë se duke qenë e vetëdijshme se çështja e zgjidhjes së kontestit me Greqinë rreth emrit duhet të ketë një epilog sa më të shpejtë për të hapur rrugën e Maqedonisë drejt antarësimit në NATO, dëshiron të ripërsëris qëndrimin se çdo zgjidhje eventuale për emërtimin e ri të shtetit duhet që të mos përmbajë emërtime që favorizojnë një etni apo emërtime që favorizojnë një religjion, pasi që Maqedonia është shtet i cili realitetin e vet shoqëror e ka multi-etnik edhe multi-religjioz.

“Duke u nisur nga fakti se tashmë Greqia ka konfirmuar se në tavolinën e negociatave është emërtimi ‘Republika e Maqedonisë së Ilindenit’, Lëvizja Besa shpreh qëndrimin e vet se ky emërtim nuk pasqyron realitetin multi-konfecional të shtetit që jetojmë dhe imponimi i këtij emërtimi do të sillte ndasi edhe më të mëdha brenda shtetit si dhe do hapte një çështje të re akoma me delikate në raportet brenda etnike dhe religjioze në vend”, thuhet në reagimin për media të kësaj partie.

“Jemi të vetëdijshëm për faktin se përmes këtij emërtimi asocohet në Republikën e Krushevës, që për ne nuk ka asgjë kontestuese, por përdorimi i termit ‘Ilinden’ që asocon me ditën e shpalljes të Republikës së Krushevës dhe ditën e festës ortodokse (Shën Ilija), është emërtim fetar që përjashton bashkësitë e tjera fetare në Maqedoni, përveç asaj ortodokse, gjë që është në kundërshtim me realitetin multi-konfecional që ka shteti”, thuhet më tej në këtë reagim, përcjell Koha.net.

Po ashtu, kjo parti thotë se dëshiron të rikujtojë kryeministrin e vendit Zoran Zaev se “forma që ai ka zgjedhur duke ulur në tavolinë vetëm opozitën maqedonase të kryesuar nga VMRO-DPMNE, po lë përshtypjen se konsenzusi që ai do të arrijë përjashton opozitën shqiptare që tashmë përfaqëson pjesën më të madhe të popullatës shqiptare në Maqedoni, dhe çdo zgjidhje për çështjen e emrit pa dakordimin e pjesës më të madhe të shqiptarëve do hapte probleme edhe më të mëdha në të ardhmen”.

OPINIONE

INTERVISTA