Zgjidhja e Zaev për emrin: Maqedonasit vendosin me referendum

Kryeministri i Maqedonisë deklaroi sot se për çdo emër të ri për vendin, për të cilin Greqia fqinje do të bjerë dakord, do të mbahet një referendum muajt e ardhshëm të këtij viti.

Zoran Zaev tha se Shkupi dhe Athina nuk kanë qenë kurrë më afër arritjes së një marrëveshjeje mbi emrin e Maqedonisë, i cili ka qenë subjekt i një mosmarrëveshjeje të gjatë 25-vjeçare.

Qeveria e Maqedonisë është zotuar të ndryshojë emrin e republikës për të adresuar shqetësimet greke, se emri aktual nënkupton pretendime territoriale në një provincë në veri të Greqisë me të njëjtin emër, Maqedoni. Në kthim, Athina ka premtuar të mos bllokojë më anëtarësimin e Maqedonisë në NATO dhe në Bashkimin Europian.

Zaev tha se do të mbahet një referendum në shtator ose në tetor, për çfarëdo zgjidhje që do të gjendet, dhe se parlamentet e të dy vendeve do të duhet të ratifikojnë marrëveshjen paraprakisht.

Kryeministri nuk përcaktoi se cili mund të jetë emri i ri, por tha se një “bisedë e rëndësishme” me homologun e tij grek, Alexis Tsipras, mbi çështjen duhet të zhvillohet deri të premten.

(Zoran Zaev me kryeministrin e Greqisë, Aleksis Tsipras)

Disa opsione ishin në lojë për emrin e ri të vendit ballkanik, duke përfshirë “Republikën e Maqedonisë Veriore”, “Republikën e Maqedonisë së Sipërme” dhe propozimin e fundit maqedonas, “Republika e Ilindenit të Maqedonisë”, për të cilin Athina nuk ka rënë dakord.

“Unë nuk do të komentoj mbi disa kritere, mbiemra ose shtesa të emrit, sepse ne jemi në fazën përfundimtare të një zgjidhjeje të mundshme për një problem më shumë se 25-vjeçar”, tha Zaev në një konferencë shtypi që shënonte një vit që kur mori detyrën./Associated Press

NDANI KËTË POSTIM

Mund tju interesojne