Dy aktivistë amerikanë dhe një palestinez u plagosën sot në një sulm nga kolonët e paligjshëm izraelitë në Bregun Perëndimor të pushtuar, sipas mjekëve dhe mediave lokale. Shoqata Palestineze e Gjysmëhënës së Kuqe tha se mjekët e saj transferuan dy amerikanë në spital pasi ata u sulmuan nga kolonët e paligjshëm në qytezën Qusra në veri të Bregut Perëndimor.
Agjencia zyrtare palestineze e lajmeve Wafa tha se një tjetër palestinez u plagos në sulm. Sipas transmetuesit, një grup kolonësh të paligjshëm sulmuan palestinezët dhe aktivistët e huaj teksa po pastronin dhe lëronin tokat bujqësore. Tensionet janë rritur në gjithë Bregun Perëndimor të pushtuar në mes të ofensivës vdekjeprurëse izraelite që ka vrarë afro 39.000 njerëz në Rripin e Gazës që nga 7 tetori 2023.
Të paktën 578 palestinezë janë vrarë dhe rreth 5.400 të tjerë janë plagosur nga zjarri i ushtrisë izraelite në Bregun Perëndimor të pushtuar që atëherë, sipas Ministrisë së Shëndetësisë. Gjykata Ndërkombëtare e Drejtësisë (GJND), në një opinion këshillues të premten, e shpalli pushtimin disadekadësh të tokave palestineze nga Izraeli “të paligjshëm” dhe tha se duhet t’i jepet fund “sa më shpejt të jetë e mundur”.
/AA
