Ekonomia e vendit, po vuan për punonjës të kualifikuar, në të gjithë sektorët, nga fasoneria e deri tek sektori i turizmit apo i teknologjisë. Për të furnizuar tregun me staf të kualifikuar Shqipëria është në bisedime me një shtet të huaj për të marrë afro 40 mijë punëtorë. Diskutimet për këtë marrëveshje u bënë të ditura nga Albin Gega drejtori i Përgjithshëm i Punësimit dhe arsimit profesional në ministrinë e Ekonomisë, por pa bërë të ditur emrin e shtetit. Ndërsa biznesi pretendon se shteti në fjalë janë Filipinet.
“Ministria po bën përpjekje të mira për të marrë punonjës cilësor nga tregu i huaj. Ajo që po them si një e re që do të ndodhë shumë shpejt është që jemi në përfundim të një kontratë me një shtet që ka punonjës të kualifikuar, profesional në pjesën e disa industrive, duke përfshirë atë të turizmit por edhe të veshjeve. Mendoj që shumë shpejt do të bëhet e mundur kjo lidhje marrëveshje, dhe do të kemi punonjës të kualifikuar që do të plotësojnë nevojat e biznesit për punonjës të kualifikuar. Kështu që përpjekjet tona krahas rritjes së cilësisë dhe performancës përmes trajnimeve, do të shkojmë edhe tek dhënia e mundësisë për punonjës.’- tha Gega.
Burime për Report Tv mësojnë se bëhet fjalë për 30-40 mijë punonjës që do të punësohen në sektorin e fasonerisë dhe në atë të turizmit. Nga këta 15 mijë punëtorë pritet të punësohen në fasoneri. Sipas informacioneve paraprake aktualisht janë mbyllur diskutimet në institucionet vendase, të gjitha sugjerimet i janë dërguar shtetit në fjalë përmes trupës diplomatike, dhe pritet të merren komentet nga ky shtet. Sipas burimeve në muajin qershor pritet firmosja e marrëveshjes nga vetë kryeministri Edi Rama.
Kapitali njerëzor tha ndër të tjera Gega në takim me bizneset, është sfidë edhe për sipërmarrjen e cila duhet të ndryshojë mënyrën se si i trajton.
Nga viti 2019-2022 kanë marrë leje qëndrimi për arsye pune në Shqipëri 10.752 të huaj, ndërsa shpesh është ngritur shqetësimi se punonjësit e huaj që vinin në vend nga vende si Bangladeshi, Siria, Nepali etje, ishin të pakualifikuar, dhe e përdornin vendin si tranzit për tu zhvendosur në vendet e BE-së./shqiptarja