Presidenti Ilir Meta po shkon drejt dekretimit të Sandër Lleshit. Ky vendim është vetëm cështje kohe. Mbase të hënën ai do të hedhë firmën mbi dekretin e ri që Rama i çoi dje në Presidencë. Kjo kuptohet nga deklarata që shpërndau sot për mediat zëdhënësi i presidenti, Tedi Blushi.
Mes rreshtash lexohet qartësisht se Meta nuk do ta kundërshtojë më emrin e Lleshit. Pyetja që shtrohet në këtë rast është kjo: Çfarë e bëri Ilir Metën të ndryshojë mendje, si iu krijua bindja e plotë për emrin e Lleshit? Natyrisht dy mund të jenë arsyet: presioni ndërkombëtar ndaj tij ose ndonjë pazar i fshehtë me Ramën për t’i mbyllur ndonjë punë, ashtu siç organizata e Rilindjes di t’i mbyllë punët.
Kujtojmë që për mosdekretimin e Sandër Lleshit në vend të Xhafēs reagoi ambasada amerikane, ambasadori i BE-së dhe diplomatë të tjerë të perëndimit.
“Prej ditës së djeshme Presidenti i Republikës Sh.T.Z Ilir Meta ka nisur procesin e bashkëpunimit me institucionet përgjegjëse për të marrë përgjigje të qarta, të plota dhe shteruese ndaj të gjitha çështjeve për të cilat Presidenti nuk mundi të sqarohej herën e parë, pavarësisht nga përpjekjet e tij të vazhdueshme për bashkëpunim lidhur me dekretimin e Sander Lleshajt në postin e ministrit të Brendshëm. Lidhur me këtë proces të ri, Presidenti ka vendosur të informojë mbi kërkesat e tij edhe Kryetarin e Kuvendit, pasi procedura e emërimit të një ministri është proces bashkëpunimi i detyrueshëm e kushtetues midis tre institucioneve (Kryeministri, Presidenti, Kuvendi)”, thuhej në reagimin e Metës.
Por cilado qoftë arsyeja që e ka shtyrë Metën të tërhiqej, duket se Rama ka qenë i sigurt për këtë lëvizje të Metës. Jo më kot e ridërgoi në Presidencë dekretin me emrin e tij.
Bindja se Meta do firmosë për Lleshin, të forcohet akoma më shumë nëse lexon më pas edhe deklaratën e shpërndarë për mediat nga Kryeministria, pak pas deklaratës së dalē nga Presidenca.
Endri Fuga vlerësoi në emër të Ramës qëndrimin e ri të Presidencës për çështjen e Lleshit.
“Kryeministri i Shqiperise, Edi Rama, e pershendet perpjekjen e Presidentit te Republikes, Ilir Meta, per te kerkuar “pergjigje te qarta, te plota dhe shterruese, ndaj të gjitha çeshtjeve”, qe sipas tij, Presidenti i Republikes, “nuk mundi te sqarohej heren e pare, pavaresisht nga perpjekjet e tij te vazhdueshme per bashkepunim”, siç shprehet Presidenti permes zedhenesit, lidhur me dekretimin e Ministrit te Brendshem. Duke shprehur besimin se ne kete proces te ri, ku Kuvendi ka padiskutim fjalen e fundit pas Kryeministrit e Presidentit, Presidenti i Republikes, nuk do te kete asnje arsye te lekundet ne bindjen e vet per respektimin e Kushtetutes dhe do ta dekretoje Ministrin e Brendshem, Kryeministri i Shqiperise do te bashkepunoje me durim e me perkushtim te plote me Presidentin e Republikes, per ta ngjitur me sukses krisjen kushtetuese qe ka sjelle e shtuna e shkuar.”, thuhet ndër të tjera në deklaratën e drejtorit të Komunikimit në Kryeministri./ lapsi.al
