Kryeministri izraelit Benjamin Netanyahu anuloi një vizitë zyrtare për një delegacion të lartë në Washington pas miratimit të një rezolute të Këshillit të Sigurimit të OKB-së që bën thirrje për armëpushim të menjëhershëm në Rripin e Gazës. Sipas transmetuesit publik izraelit KAN, Netanyahu anuloi vizitën e delegacionit pasi SHBA-ja abstenoi nga përdorimi i vetos kundër rezolutës.
Në një deklaratë të zyrës së Netanyahut thuhet se vendimi i SHBA-së për të lejuar miratimin e rezolutës është “një tërheqje e qartë nga pozicioni konsistent i SHBA-së në Këshillin e Sigurimit që nga fillimi i luftës”. Kryeministri izraelit kërcënoi më herët se do të anulonte vizitën e delegacionit nëse Washingtoni nuk vë veton ndaj rezolutës së OKB-së. Delegacioni izraelit ishte planifikuar të vizitonte Washingtonin për të dëgjuar propozimet e SHBA-së për zgjerimin e ndihmës humanitare në Gaza, si dhe alternativat ndaj sulmit tokësor të planifikuar të Izraelit në qytetin Rafah në jug të Rripit të Gazës.
Vizita u njoftua pas një bisede telefonike midis Netanyahut dhe presidentit të SHBA-së Joe Biden javën e kaluar. Këshilli i Sigurimit i OKB-së miratoi sot një rezolutë që kërkon armëpushim të menjëhershëm në Rripin e Gazës për muajin e Ramazanit./AA
