Komisioni Evropian njoftoi të premten se do të “vazhdojë me pagesën” e 50 milionë eurove (54.1 milionë dollarë) agjencisë së OKB-së për refugjatët palestinezë (UNRWA) javën e ardhshme. Kësti i dytë dhe i tretë prej 16 milionë eurosh do të lëshohen më vonë, thuhet në një deklaratë të KE-së.
“Përveç mbështetjes për UNRWA-në, Komisioni mbetet plotësisht i përkushtuar për të adresuar gjendjen e vështirë humanitare të popullit palestinez, veçanërisht në Gaza, por edhe më gjerësisht në rajon. Për këtë qëllim, ne do të ndajmë 68 milionë euro shtesë për vitin 2024”, tha KE-ja.Pagesa shtesë do të sjellë shumën totale në 150 milionë euro, thuhet në deklaratë.
“Komisioni ka ndarë 125 milionë euro ndihma humanitare për palestinezët për vitin 2024. Komisioni po kontrakton sot 16 milionë eurot e para”, thuhet në deklaratën e KE-së.
Disa vende pezulluan fondet e tyre për UNRWA-në në janar pas akuzave të Izraelit se 12 nga mijëra punonjës të agjencisë morën pjesë në sulmin e 7 tetorit të Hamasit ndaj Izraelit. Agjencia po heton pretendimet, por ka paralajmëruar se ndërprerja e financimit rrezikon një katastrofë./AA
