Në një intervistë të botuar sot, kryediplomati i BE-së, Josep Borrell, e ka krahasuar Gazën me Ukrainën dhe ka thënë se disa nga përgjigjet ushtarake të Izraelit janë në kundërshtim me ligjin ndërkombëtar.
“Ne e kemi thënë në Ukrainë dhe e themi në Gaza: nuk mund t’i ndërpresësh ujin dhe të gjitha shërbimet komunale një popullsie të tërë”, ka thënë shefi i politikës së jashtme të BE-së për të përditshmen spanjolle El Pais.
“Ne duhet të vazhdojmë të përsërisim, të bëjmë presion dhe të këmbëngulim (që Izraeli të jetë në përputhje me ligjin ndërkombëtar)”, ka theksuar ai.
Komentet e Borrellit vijnë një ditë pasi presidentja e Komisionit Evropian Ursula von der Leyen fluturoi për në Izrael, ku u takua me kryeministrin Benjamin Netanyahu dhe u zotua për mbështetjen e Evropës për Izraelin.
Por ndërsa dënoi Hamasin se e ka bërë të pamundur gjetjen e zgjidhjeve paqësore, Borrell, politikan spanjoll, gjithashtu ka kërkuar mënyra.
“Ajo që ndodhi nuk ka ndodhur për një kohë të gjatë dhe emocionet janë të larta…Tani ne duhet të merremi me gjënë më urgjente, që është situata në Gaza dhe parandalimi i përhapjes së konfliktit”, ka shtuar ai.
Lidhur me urdhrin e ushtrisë izraelite për evakuim, Borrell ka thënë gjithashtu se është “plotësisht joreale” të kërkohet që 1 milion njerëz të evakuojnë Gazën veriore në 24 orë.
“Delegacioni ynë atje ka marrë informacion nga njerëz në strehimore dhe spitale ku ka njerëz të plagosur të cilët thonë: ‘Si do të ikim, si mund të lëvizim nëse nuk ka as transport?’”
Ndërsa konflikti ka nxjerrë në dritë ndarjet e vjetra në Evropë, Borrell ka thënë se “shumica dërrmuese” e zyrtarëve të BE-së në një takim në fillim të kësaj jave ishin kundër pezullimit të ndihmës për Palestinën.
Ai ka deklaruar gjithashtu se pasi ka folur me “të gjithë aktorët” në pikën kufitare Rafah midis Gazës dhe Egjiptit, infrastruktura është dëmtuar shumë nga bombardimet. Megjithatë, Borrell ka thënë nëse Izraeli ndalon bombardimet, ai parashikon se do të jenë në gjendje të dërgohen ndihma humanitare në Gaza dhe të kryhen evakuime të zgjedhura.
Diplomati më i lartë i BE-së ka thënë se e gjithë kjo krizë “dëshmon se komuniteti ndërkombëtar ka harruar problemin palestinez”.
“Izraeli po bënte paqe me vendet e tjera arabe, por e anashkaloi Palestinën. Paqja gjithashtu duhet të farkëtohet mes palestinezëve dhe izraelitëve. Nëse jo për gjë tjetër, kjo mund të shërbejë si një thirrje urgjente për komunitetin ndërkombëtar që të përpiqet t’i përgjigjet kësaj”, ka thënë Borrell.
Borrell, i cili sapo përfundoi një udhëtim në Kinë, ka thënë se ka folur me ministrin e jashtëm kinez edhe për situatën izraelito-palestineze.
“Ministri kinez, si të tjerët nga vendet arabe, theksoi se ne i kemi harruar palestinezët. Jemi dakord me këtë, por kjo nuk e justifikon atë që bën Hamasi dhe sigurisht që nuk e ndihmon kauzën palestineze”, ka deklaruar shefi i politikës së jashtme të BE-së./AA
