Gjatë mbrëmjes së sotme ndërroi jetë një pacient i shtruar në spitalin Infektiv, i konfirmuar me COVID-19, i cili vuante nga kanceri në mushkëri, në stad tejet të avancuar.
71-vjeçari me origjinë nga Kuçova, i trajtuar më herët në spitalin universitar “Shefqet Ndroqi”, prej 7 ditësh ishte shtruar në spitalin Infektiv dhe gjatë mbrëmjes pati një komplikacion të menjëhershëm kardiak arterial.
71-vjeçari vuante nga disa sëmundje shoqëruese: Kancer mushkërie, diabet mellitus, fibrilacion arterial dhe hipertension.
Ministria e Shëndetësisë dhe Mbrojtjes Sociale shpreh ngushëllimet familjes së të ndjerit dhe apelon dhe një herë qytetarët të respektojnë rregullat e distancimit social dhe të telefonojnë 127 në rast se kanë shenja të sëmundjes.
Me këtë vdekje, numri i viktimave në Shqipëri nga COVID- 19 shkon në tre pas të moshuarve nga Durrësi dhe Lushnja të pak ditëve më parë.
Sot Shqipëria shënoi rekord sa i përket numrit të rasteve me koronavirus brenda 24 orëve teksa ato ishin 13 dhe e çuan numrin total në 89. Drejtoresha e Përgjithshme e ISHP, Albana Fico raportoi për opinionin publik se raste të reja kishte në Korçë 3, Tiranë 8, Kavajë 1 dhe Durrës 1.
Në Vlorë ka dyshime për 4 anëtarë të një familjeje që dyshohet se janë infektuar prej nipit të tyre të ardhur nga Italia 2 javë më parë por pritet testimi./BW
