Tiranë-Kreu i Bashkisë së Tiranës Erion Veliaj nuk i ka të pakta fotot dhe videot që ai shpërndan në rrjetet sociale.
Së fundmi ka qenë fotoja e një pallati, fasada e të cilit sipas Veliajt është zbukuar me dashuri të madhe nga Eljan Tanini. “Ishte/është! Gjëra të vogla, me dashuri të madhe, sipas mundësisë së secilit për Tiranën! Shumë faleminderit Eljan Tanini.”, shprehet Veliaj teksa poston edhe dy fotot.
Kush është Eljan Tanini?
Ai themelues i organizatës “Mbill Pemën Tënde” dhe veprimtar i “Lëvizjes pro Parkut”. Eljan Tanini u bë i njohur nga publiku pasi protestoi kundër asaj që ai e quante betonizimi i Parkut të Liqenit dhe doli kundër kreut të Bashkisë Erion Veliajt për këtë projekt. Madje Tanini u arrestua edhe nga policia pasi nuk lejonte që të betonizohej Parku i Liqenit.
Ajo që i ‘çuditi’ të gjithë më pas, ishte se Tanini fitoi një konkurs të Bashkisë për krijimin e disa skulpturave dekorative për parqet e ambientet publike të qytetit të Tiranës. Ai u bë fitues me veprën “Raketa” . Pas kësaj Tanini u shpreh se do të vazhdonte të protestonte për parkun.
Por Veliaj së fundmi i ka besuar edhe zbukurimet e fasadave të qytetit Taninit dhe e ka falenderuar atë. Madje sipas tij, Tanini i ka zbukuruar fasadat me dashuri të madhe.