Programi i përkohshëm në Kanada i punëtorëve të huaj, sipas të cilit deri në 60,000 njerëz mbërrijnë në vend çdo vit, po çon në forma moderne të skllavërisë, ka paralajmëruar një ekspert i Kombeve të Bashkuara.
Pas një vizite dy-javore faktmbledhëse në Kanada, raportuesi special i OKB-së për format bashkëkohore të skllavërisë, Tomoya Obokata, tha të mërkurën se ai ishte “thellësisht i shqetësuar nga rrëfimet e shfrytëzimit dhe abuzimit” për të cilin ishte informuar nga punëtorët migrantë.
“Regjimet e lejeve të punës specifike për punonjësit, duke përfshirë disa Programe të Përkohshme të Punëtorëve të Huaj (TFWP), i bëjnë punëtorët migrantë të cenueshëm ndaj formave bashkëkohore të skllavërisë, pasi ata nuk mund të raportojnë abuzimet pa frikën nga dëbimi”, tha Obokata në një deklaratë të botuar në faqen e internetit të zyrës për të Drejtat e Njeriut të OKB-së.
Programi i diskutueshëm parashikon që 50,000 deri në 60,000 punëtorë të huaj të mbërrijnë në Kanada çdo vit, por prej disa vitesh është përballur me akuza për shfrytëzim sistematik. Punëtorët e huaj në sektorë të ndryshëm, duke përfshirë bujqësinë dhe përpunimin e mishit, janë ankuar për kushte të këqija, si dhe kanë pasur mundësi të kufizuara për të adresuar rastet e abuzimit.
Hetimi i OKB-së vjen pak më shumë se një vit pasi një grup punonjësesh ferma xhamajkanë u ankuan në një letër drejtuar ministrit të punës së vendit të tyre se puna që ata detyroheshin të kryenin në dy ferma në Ontario ishte e ngjashme me “skllavërinë sistematike”. Letra përshkruante akuzat se ata ishin “të ekspozuar ndaj pesticideve të rrezikshme pa mbrojtje të duhur dhe shefat tanë abuzojnë verbalisht, duke na sharë”.
Skema e punëtorëve të huaj të Kanadasë i lejon punëdhënësit të punësojnë punëtorë nga Meksika dhe njëmbëdhjetë vende të Karaibeve deri në tetë muaj të vitit.
Në deklaratën e tij, raportuesi i posaçëm i bëri thirrje gjithashtu Kanadasë që të ofrojë një “rrugë të qartë drejt qëndrimit të përhershëm për të gjithë migrantët, për të parandaluar përsëritjen e abuzimeve”. Ai shtoi se punëtorët e huaj “kanë aftësi të vlefshme që janë kritike për ekonominë kanadeze” dhe u bëri thirrje ligjvënësve të shtyjnë përpara legjislacionin për të mbrojtur të drejtat e punëtorëve nga jashtë shtetit.
Një studim i vitit 2014 nga Revista kanadeze e shoqatës së Mjekëve “Open” tha se 787 punëtorë migrantë të fermave në Ontario u riatdhesuan në vendet e tyre të origjinës pasi pësuan lëndime gjatë punës së tyre, disa prej të cilëve u transportuan me njoftim paraprak të kufizuar dhe pa iu lejuar aksesi ndaj trajtimit mjekësor./GazetaImpakt/Rt/
