Vendimin e Bashkësisë Islame të Kosovës dhe rekomandimet e Institutit Kombëtar të Shëndetit Publik të Kosovës që namazi i Fitër Bajramit të mos falet në xhami, duket se jo të gjithë e respektuan.
Vendimi i BIK-ut nuk u respektua në fshatin Biçec të Kaçanikut. Atje rreth 30 besimtarë myslimanë bashkë me imamin falën namazin e Bajramit në xhaminë e fshatit.
Për t’iu bashkuar në falje në xhami tentuan të hynin edhe banorët tjerë, por u penguan nga Policia e Kosovës.
Këtë ngjarje e ka konfirmuar zëdhënësi i policisë për rajonin e Ferizajt, Agim Gashi i cili tha se besimtarët u hasën në xhami gjatë një kontrolli të policisë në atë pjesë, por ata që kishin filluar faljen, nuk u penguan.
“Po, mund t’ua konfirmoj se në xhaminë e fshatit Biçec gjatë kontrollimit Policia ka hasur në 20, 30 persona banorë të fshatit të cilët kanë qenë duke e falur namazin e Bajramit. Ka pasur edhe persona të tjerë që kanë ardhur pastaj, por policia nuk i ka lejuar të futen në xhami. Personat të cilët kanë qenë në xhami nuk janë penguar, por do të merret masa ndaj tyre. Sigurisht që me ta ka qenë edhe imami i fshatit”, tha Gashi për Sinjalin.
Të gjitha xhamitë në Kosovë u mbyllën më 16 mars dhe për shkak të situatës së krijuar nga COVIID-19, ato nuk u hapën as sot për Fitër Bajram./tpz
