Qeveria britanike ka miratuar shitjen e armëve në Izrael me vlerë mbi 17 milionë dollarë në vitin 2018, kur ushtarët izraelitë u akuzuan se qëlluan dhe vranë qëllimisht protestuesit palestinezë në kufirin e Gazës, transmeton Anadolu Agency (AA).
Informacioni i lëshuar nga Departmenti i Tregtisë Ndërkombëtare (DIT) dhe i hartuar nga Fushata Kundër Tregtisë së Armëve (CAAT) tregon se janë lëshuar licenca për shitjen e armëve që përfshinin pjesë për pushkë sulmi, municione dhe armë të tjera që do të përdoreshin kundër demonstratave palestineze.
Po ashtu, gjatë një debati në parlament në të njëjtën ditë, shtatë deputetë kërkuan një shqyrtim më të madh mbi eksportet e armëve të Mbretërisë së Bashkuar në Izrael. Disa madje kërkuan vendosjen e një ndalimi të plotë të shitjes së armëve në Tel Aviv.
Megjithatë, kjo nuk e ndaloi qeverinë nga miratimi i licencave për të furnizuar teknologjitë e raketave, pajisjet ushtarake radare dhe pajisjet e vizionit të natës në shumën 18 milionë dollarë nga 30 marsi deri në fund të vitit 2018.
“Mesazhi që dërgon është se pa marrë parasysh se çfarë mizori janë shkaktuar ndaj popullit palestinez, shitjet e armëve do të vazhdojnë. Nëse të shtënat në kufi nuk ndaluan shitjen e armëve, nëse bombardimet në vitin 2014 dhe 2008 nuk ndaluan atë, çfarë më shumë do t’i ndalojë…”, tha Andrew Smith, zëdhënës i fushatës CAAT.
Smith tha se edhe pse nuk është e qartë nëse armët e prodhuara në Mbretërinë e Bashkuar janë përdorur në mënyrë specifike ndaj protestuesve, kjo simbolizon prioritetin e qeverisë në zgjedhjen e biznesit mbi moralin dhe etikën.
Zbulimet e fundit vijnë pasi një gjykatë britanike deklaroi se eksportet e armëve të Mbretërisë së Bashkuar në Arabinë Saudite ishin të paligjshme, pasi ata kontribuan në vdekjet dhe viktimat civile në bombardimet e udhëhequra saudite në Jemen. Gjykata tha se qeveria kishte dështuar të vlerësonte nëse një kontribut i tillë do të shkelte ligjin ndërkombëtar humanitar.
Në një intervistë me “Middle East Eye”, ambasadori palestinez në Mbretërinë e Bashkuar, Husam Zomlot, tha se është përgjegjësia e qeverisë britanike të vlerësojë nëse shitjet e armëve janë të ligjshme ose jo. Ai shtoi se ka një kontekst më të gjerë ligjor që duhet analizuar përtej tregtisë së armëve.
“Qeveria e Mbretërisë së Bashkuar mund të thotë vetëm nëse ajo e ka kryer procesin në mënyrën e duhur. Ne nuk jemi të vetëdijshëm për një proces të tillë për të siguruar që këto armë nuk dëmtojnë palestinezët e pafajshëm dhe nuk përfundojnë duke ndihmuar Izraelin në pushtimin e tij të paligjshëm, si dhe në kolonizimin e tokës dhe popullin e Palestinës”, tha Zomlot.
Në mars të vitit 2018, deri në 190 civilë u vranë dhe mbi 6 mijë të tjerë u plagosën gjatë protestave kundër pushtimit dhe rrethimit izraelit në territoret palestineze. Protestat u etiketuan “Marshi i Kthimit të Madh” dhe “Ndërprerja e Rrethimit”.
Komisioni i Pavarur i OKB-së për hetimin e protestave të vitit 2018, i formuar nga Këshilli i të Drejtave të Njeriut në vitin 2018, hulumtoi reagimin e dhunshëm të forcave pushtuese izraelite ndaj protestuesve palestinezë në kufi dhe tha se Izraeli mund të jetë fajtor për krime lufte./ AA
