Gjykata e Posaçme Kundër Korrupsionit dhe Krimit të Organizuar (GJKKO) ka rrëzuar sot kërkesat e paraqitura nga avokatët e të pandehurve në dosjen e njohur si “Partizani”, të cilët pretendonin pavlefshmëri absolute të disa akteve hetimore të kryera nga Prokuroria e Posaçme (SPAK).
Në vendimin e saj, GJKKO arsyetoi se kërkesat e mbrojtjes janë të pabazuara në ligj dhe në prova, duke theksuar se veprimet e ndërmarra gjatë fazës paraprake nga gjyqtarja Irena Gjoka janë kryer në përputhje me procedurat ligjore.
“Pretendimet për tejkalim të kompetencave nga SPAK nuk gjejnë mbështetje në ligj apo në prova,” – thuhet në arsyetimin e gjykatës.
Sipas GJKKO-së, të gjitha masat e sigurimit personal dhe pasuror janë shqyrtuar më parë në të gjitha shkallët e drejtësisë, përfshirë Gjykatën Kushtetuese, ndaj nuk mund të konsiderohen të pavlefshme.
Sa i përket pretendimeve se disa ekspertë nuk ishin të licencuar apo ndodheshin në konflikt interesi, gjykata vlerësoi se këto raste nuk sjellin pavlefshmëri të akteve hetimore.
Sipas vendimit, ekspertët e Institutit të Policisë Shkencore kanë vepruar në përputhje me ligjin, ndërsa argumentet e mbrojtjes u cilësuan si “deklarative”.
Gjykata ka njoftuar se do të thërrasë një ekspert topograf për të dëshmuar mbi kualifikimet e tij, përpara se të shprehet përfundimisht mbi një nga kërkesat për pavlefshmëri absolute.
GJKKO rrëzoi gjithashtu pretendimet e mbrojtjes për sekuestrimin dhe ekspertimin e pajisjeve kompjuterike si të kryera në kundërshtim me ligjin.
Në arsyetim thuhet se sekuestrimet në “Studio Pustina” dhe të dhënat e marra nga kompania “Homeplan” janë të ligjshme, por të dhënat e pajisjeve që më pas iu kthyen të pandehurve nuk mund të përdoren si prova.
Gjykata konstatoi gjithashtu se nuk ka pasur shkelje të afateve ligjore për kryerjen e ekspertimeve, dhe nuk janë gjetur prova për ndikim apo mungesë paanësie nga ekspertët gjatë hetimeve./tpz
