Pas sulmeve ajrore izraelite ndaj Iranit dhe vrasjes së disa komandantëve të lartë të Gardës Revolucionare Iraniane (IRGC), Hezbollahu reagoi me një deklaratë dënuese dhe shprehu ngushëllime për zyrtarët iranianë të vrarë. Por, sipas analistëve, kjo deklaratë tregoi gjithashtu se grupi nuk ka ndërmend të përfshihet ushtarakisht në konflikt – të paktën për tani.
Qassem Kassir, analist politik libanez i afërt me Hezbollahun, tha se “aktualisht nuk ka nevojë që Hezbollahu të ndërhyjë, pasi raketat iraniane janë të mjaftueshme për të përballuar Izraelin”. Megjithatë, ai paralajmëroi se nëse konflikti përshkallëzohet në një luftë të plotë, situata mund të ndryshojë.
Disa analistë të tjerë thonë se mungesa e reagimit ushtarak të Hezbollahut mund të jetë tregues i paaftësisë së tij për të ndërhyrë. Kjo vjen pas një fushate intensive izraelite në Liban, e cila ka dobësuar udhëheqjen politike dhe ushtarake të grupit, përfshirë vrasjen e liderit historik, Hassan Nasrallah.
Në të njëjtën kohë, Hezbollahu po përballet me presion të rritur nga shteti libanez, i mbështetur nga SHBA dhe Izraeli, për t’u çarmatosur dhe për t’i lënë përdorimin e forcës vetëm në duart e shtetit.
Për momentin, Hezbollahu mbetet spektator, por zhvillimet në ditët në vijim mund ta detyrojnë të rimendojë pozicionin e tij. /mesazhi
