Lideri i Partisë Laburiste, Jeremy Corbyn, e ka quajtur qeverinë e kryeministres May “qeveri fantazmë” e cila nuk mund ta qeverisë shtetin dhe ka kërkuar që vendi të shkojë në zgjedhje të parakohshme.
Përderisa po e hapte debatin parlamentar për mocionin e mosbesimit, Corbyn tha se gjëja e duhur që duhet ta bëjë qeveria është të dorëhiqet për shkak të humbjes historike në votimin e marrëveshjes për tërheqjen e Britanisë së Madhe nga Bashkimi Evropian. Në anën tjetër, kryeministrja ka thënë se zgjedhjet thjesht nuk janë në interesin e vendit.
Pritet që votimi për rrëzimin e qeverisë në kuvend të mbahet sonte rreth orës 19. Mocioni i kreut të opozitës mbështetet edhe nga deputetët e partisë “SNP”, liberalë-demokratët dhe Partia e Gjelbër. Sidoqoftë, disa figura të rëndësishme të laburistëve kanë thënë se ky votim ka pak gjasa të shënojë sukses për shkak se kryeministrja gëzon mbështetje nga shumica e deputetëve konservatorë dhe disa parti tjera të vogla.
Kryeministrja May ka thënë se është e gatshme t’i dëgjojë qëndrimet e deputetëve që do ta mundësonin identifikimin e kërkesave për ta mbështetur marrëveshjen. Ajo ka ofruar mbajtje të negociatave mes partive politike për ta gjetur një zgjidhje të pranueshme nga të gjithë, shkruan “BBC”.