“Në bisedimet ndërmjet qeverisë së drejtuar nga Presidenti Nicolas Maduro dhe përfaqësuesve të opozitës është shënuar progres. Palët kanë tendencë për të vijuar negociatat”, deklaroi ministrja norvegjeze e Punëve të Jashtme, Ine Eriksen Soreide, një ditë pas përfundimit të raundit të dytë të bisedimeve.
“Palët demonstruan vullnetin e tyre për të vazhduar kërkimin e zgjidhjes kushtetuese mbi të cilën do të pajtohen, për çështjet politiko-ekonomike dhe zgjedhjet”, shtoi ajo.
Soreide paralajmëroi palët që të bëjnë kujdesin maksimal në prononcimet e tyre për median, në mënyrë që të ruhet integriteti i procesit dhe të arrihet rezultat.
Nga ana tjetër, ekzistenca e këtyre bisedimeve u konfirmua edhe nga Presidenti Maduro gjatë një fjalimi të transmetuar në televizionin shtetëror të Venezuelës.
“Unë krenohem me përpjekjet e delegacionit tonë në Norvegji. Jam krenar për dialogun konstruktiv që po realizojmë me opozitën venezuelase”, tha ai.
Në një prononcim pas negociatave, opozitarët u shprehën gjithashtu të gatshëm për të bashkëpunuar me Norvegjinë për gjetjen e zgjidhjes, pavarësisht se në bisedime nuk është arritur ende një marrëveshje.
Venezuela po përballet që nga 10 janari i këtij viti me protesta, të cilat nisën kur Presidenti Nicolas Maduro u betua për një mandat të dytë pasi fitoi zgjedhjet e bojkotuara nga opozita.
Tensionet u përshkallëzuan më tej më 23 janar, kur Guaido u vetëshpall president i përkohshëm i Venezuelës, një veprim që u mbështet fillimisht nga SHBA-ja dhe më pas nga shumë vende evropiane e amerikanojugore.
Kurse Turqia, Meksika, Rusia, Irani, Kuba, Kina dhe Bolivia konfirmuan mbështetjen e tyre për Presidentin Maduro./trt