Bota

Pakistani dënon planin izraelit për banime ilegale në Kudsin Lindor

Zëdhënësi i Ministrisë pakistaneze të Punëve të Jashtme, Zahid Hafeez Chaudhri, tha se vendimi i Izraelit është i paligjshëm sipas ligjit ndërkombëtar dhe rezolutave përkatëse të OKB-së

Islamabad

Pakistani dënoi Izraelin për vendimin e tij për të ndërtuar njësi të reja banimi në Kudsin Lindor të okupuar, transmeton Anadolu Agency (AA).

Në një deklaratë, zëdhënësi i Ministrisë pakistaneze të Punëve të Jashtme, Zahid Hafeez Chaudhri, tha se vendimi i Izraelit është i paligjshëm sipas ligjit ndërkombëtar dhe rezolutave përkatëse të OKB-së.

“Ne kemi përcjellur me shqetësim serioz hapjen e Izraelit të procesit të tenderimit për ndërtimin e njësive të reja të banimeve kolone në territoret e okupuara palestineze”, tha Chaudhri.

Ai shtoi se Pakistani mbështet me vendosmëri të drejtën e patjetërsueshme të popullit palestinez për vetëvendosje dhe përsëriti pozicionin e qëndrueshëm dhe të qartë të vendit të tij për një paqe të drejtë dhe të qëndrueshme në Lindjen e Mesme.

“Është e domosdoshme të kemi një zgjidhje me dy shtete në përputhje me rezolutat përkatëse të OKB-së dhe OBI-t, me kufijtë para vitit 1967, dhe Al-Kuds Al-Sherifin si kryeqyteti i një shteti palestinez të zbatueshëm, të pavarur dhe të bashkuar”, shtoi Chaudhri.

Më 14 nëntor, media izraelite zbuloi se Izraeli planifikon të ndërtojë 1.257 njësi të reja banimi në zonën izraelite Givat Hamatos të Kudsit Lindor të pushtuar.

Izraeli pushtoi territoret palestineze, përfshirë Bregun Perëndimor, Kudsin Lindor dhe Rripin e Gazës në vitin 1967. Palestinezët i duan këto territore për krijimin e një shteti të ardhshëm palestinez.

OPINIONE