Greqia sot shpalli dy NAVTEX-e (alarme lundrimi) të reja që mbulojnë një gamë të gjerë të zonës që përfshin edhe fushën e përgjegjësisë së Turqisë, duke shkaktuar tensione të reja midis dy vendeve.
Ndërsa Turqia vazhdon të bëjë përpjekjet e nevojshme për të zgjidhur çështjet në Egje dhe Mesdheun Lindor përmes dialogut, Greqia lëshoi alarme lundrimi me arsyetimin e një stërvitjeje ushtarake.
Menjëherë pas këtij hapi provokativ të Greqisë, stacioni NAVTEX i Antalyas në Turqi lëshoi një alarm lundrimi duke thënë se zona është në fakt zonë e përgjegjësisë së Turqisë.
NAVTEX, ose Navigational Telex, është një sistem i komunikimit detar që lejon anijet të informojnë anijet e tjera për praninë e tyre në një zonë, si dhe informacione të tjera.
Provokimi nga Greqia erdhi në kohën kur po ndërmerren hapa për të zgjidhur problemet në Mesdheun Lindor përmes dialogut.
Në një deklaratë të bërë nga stacioni NAVTEX i Antalyas thuhet se një stacion i paautorizuar transmetoi një njoftim në lidhje me një zonë brenda shërbimit turk NAVTEX, duke bërë që Turqia të rishpallë NAVTEX për zonën e saj të përgjegjësisë.
Deklarata nga Turqia gjithashtu vuri në dukje se stërvitjet ushtarake të qitjes do të mbaheshin në zonat e përmendura në Mesdheun Lindor më 6 dhe 8 Tetor.
Burimet e sigurisë, duke folur në kushte anonimiteti, theksuan se NAVTEX-et e shpallura nga Greqia përmes një stacioni të paautorizuar në një zonë të gjerë në Mesdheun Lindor me qëllim të stërvitjes me të shtëna nuk do të zgjidhin problemet, por do të rrisin tensionet në rajon.
Duke nënvizuar që Turqia preferon zgjidhje në Egje dhe Mesdheun Lindor brenda fushës së ligjit ndërkombëtar, dialogut dhe marrëdhënieve të fqinjësisë së mirë, burimet thanë se Ankaraja ndërmerr një numër hapash në këtë çështje.
Ata thanë që Ankaraja ka marrë në konsideratë zvogëlimin e fushës së disa stërvitjeve ushtarake dhe madje shtyrjen e disa prej tyre në mënyrë që të kontribuojë në zgjidhje.
Përkundër të gjithë këtyre hapave me qëllim të mirë të ndërmarra nga Turqia, burimet theksuan se përgjigjja e Greqisë synon të prishë bisedimet./AA
