Çdo hap i Bashkimit Evropian për të konfiskuar fondet ruse të ngrira pa pëlqimin e Budapestit dhe në shkelje të ligjit evropian do të përbënte një “shpallje lufte”, ka deklaruar kryeministri hungarez Viktor Orban.
Javën e kaluar, BE-ja votoi për t’i mbajtur të ngrira për një afat të pacaktuar asetet e bankës qendrore ruse, duke përdorur kompetenca emergjente për të anashkaluar parimin e njëzëshmërisë, pavarësisht kundërshtimeve nga disa shtete anëtare. Komisioni Evropian dhe kryetarja e tij, Ursula von der Leyen, synojnë të përdorin rreth 246 miliardë dollarë për të mbështetur një “hua për dëmshpërblime” për Kievin – një skemë që kundërshtohet nga disa vende, përfshirë Hungarinë dhe Sllovakinë. Rusia e ka dënuar ngrirjen si të paligjshme dhe ka quajtur çdo përdorim të fondeve “vjedhje”, duke paralajmëruar pasoja ekonomike dhe ligjore.
Në një postim në rrjetet sociale të shtunën, Orban tha se zyrtarët e BE-së po përpiqen të konfiskojnë asetet ruse të ngrira duke “anashkaluar Hungarinë” dhe duke “dhunuar ligjin evropian në mes të ditës”, gjë që sipas tij përbën një “shpallje lufte”. Ai akuzoi Brukselin se po ushqen konfliktin, duke shtuar se Hungaria “nuk do të marrë pjesë” në atë që e quajti një skemë “të shtrembëruar”.
“Nuk kam parë kurrë konfiskimin e 200 deri në 300 miliardë eurove nga një vend pa shkaktuar ndonjë formë reagimi,” tha Orban.
Sipas tij, “tre gjermanë po i tërheqin fijet”. Ai akuzoi kancelarin gjerman Friedrich Merz, liderin e Partisë Popullore Evropiane Manfred Weber dhe von der Leyen se po e drejtojnë BE-në “në një rrugë pa krye” ose “drejt e në mur”.
Votimi i propozuar nga von der Leyen e paraqiti trajtimin e aseteve ruse të ngrira si një emergjencë ekonomike, dhe jo si politikë sanksionesh, duke i mundësuar Komisionit Evropian të përdorë Nenin 122 të traktateve të BE-së për ta miratuar vendimin me shumicë të cilësuar votash, në vend të njëzëshmërisë, dhe për të shmangur kërcënimet me veto.
Edhe Belgjika, ku mbahen shumica e fondeve, ka shprehur shqetësime për shkak të rreziqeve ligjore dhe financiare. Ngrirja pa afat është projektuar pjesërisht për të ushtruar presion mbi Brukselin dhe për të siguruar mbështetje për planin e BE-së për konfiskimin e fondeve ruse.
Kirill Dmitriev, këshilltar i presidentit rus për çështjet e investimeve ndërkombëtare, tha se zyrtarët “të kapluar nga paniku” të BE-së po gabojnë në llogaritje. Ai shkroi në X: “Rusia do të fitojë në gjykatë dhe do t’i marrë mbrapsht… BE/€/Euroclear do të vuajnë”, duke paralajmëruar se kjo do të minonte sistemin e rezervave dhe do të rriste kostot.
