M.B. po shkonte me një koleg të tij në Strugë për të argëtuar dasmorët. Ai i bie darabukut, ndërkaq kolegu i tij tupanit.
Teksa po kalonin në kufirin në Han të Elezit, që lidh Kosovën me Maqedoninë, ai kishte nxjerrë letrën poseduese për instrumentet e tyre në institucionet kosovare. Ndonëse aty shkruhet se ‘këto mjete dalin përkohësisht jashtë shtetit’, kjo nuk kishte mjaftuar për policin maqedonas. Ai kishte kërkuar 20 euro në mënyrë që t’i linte të kalonin, shkruan Gazetametro.net.
M.B, i ka rrëfyer Gazetametro.net se rasti ka ndodhur dje rreth orës 17:00. Siç thotë ai, polici maqedonas kishte ngulur këmbë që nuk do t’i lejonte të kalonin po që se nuk paguajnë 20 euro. Këtë gjë, M.B. e quan plaçkitje që policia maqedonase ua bën kosovarëve.
‘Kemi nxjerrë letrën e cila tregon se mjetet do të kalojnë përkohësisht, por polici maqedon na kërkonte 20 euro që ta kalonim’, i tregon Metros, M.B.
Për këtë, ai rastin e ka lajmëruar edhe në Policinë dhe Doganën e Kosovës sot teksa po kthehej. Metro ka kërkuar informacion nga policia, por ata kanë thënë se është problem meqë ky rast ka ndodhur jashtë territorit të Kosovës.
Po ashtu, M.B. për rastin është ankuar edhe në Ambasadën e Kosovës në Maqedoni. Ai u ka kërkuar që ta ngrenë këtë çështje, duke shpresuar se ambasada do të veprojë për këtë çështje.
“Ju lutem si Ambasadë të merrni masa ndaj kësaj plaçke që e bëjnë për kosovarët sa herë që hyjnë në Maqedoni. Qytetarët kosovarë po ndëshkohen në mënyrë të paligjshme dhe krejtësisht idioteske nga ana e maqedonëve. Besoj se kërkesa ime do të gjejë mirëkuptim nga ana e juaj’, i ka shkruar M.B., Ambasadës së Kosovës në shtetin fqinj.
Ndryshe, Metro mëson se ky nuk është rasti i vetëm, pasi edhe i njëjti person ka rastisur edhe disa herë në këso kërkesa nga policia maqedonase, e po ashtu edhe disa qytetarë të tjerë kanë adresuar ankesën e njëjtë.
