Ambasada e Shteteve të Bashkuara të Amerikës në Tiranë është shprehur e zhgënjyer nga deklaratat e Kryeministrit Edi Rama për President të përbashkët mes Shqipërisë dhe Kosovës.
Në një postim në Twitter, ambasada amerikane thotë se të tilla deklarata dëmtojnë marrëdhëniet e Shqipërisë me vendet e tjera fqinje në rajon.
“Ambasada e SHBA mbeti e zhgënjyer nga deklarata e Kryeministrit Rama mbi Shqipërinë dhe Kosovën me rastin e 10 vjetorit të Pavarësisë së Kosovës.
Gjuha e shkujdesur që aludon për bashkim është e padobishme dhe dëmton marrëdhëniet e Shqipërisë me vendet fqinje. Ne i bëjmë thirrje udhëheqësve që të jenë fqinjë të mirë dhe të lënë mënjanë gjuhën ndarëse të së shkuarës”, thuhet në deklaratën e ambasadës së SHBA.
Gjatë seancës solemne të Kuvendit të Kosovës më 18 Shkurt për 10-vjetorin e Pavarësisë, Kryeministri Edi Rama hodhi idenë e një Presidenti të përbashkët të unitetit kombëtar mes Shqipërisë dhe Kosovës.
Kjo deklaratë e tij pasoi me reagime kundërshtuese nga mediat greke dhe serbe, por edhe nga Komisioni Evropian.
o.j/dita