Presidenti iranian Ebrahim Raisi tha se vendet myslimane duhet të ndërpresin të gjitha marrëdhëniet politike dhe ekonomike me Izraelin për të detyruar regjimin sionist të ndalë krimet e tij kundër popullit të Palestinës. Në një bisedë telefonike me presidentin turk Rexhep Tajip Erdogan të dielën, Raisi tha se administrata amerikane vazhdon t’i japë Izraelit mbështetje të gjerë financiare dhe ushtarake.
“Një nga mënyrat më efektive për të detyruar sionistët të ndalojnë krimet në Gaza është ndërprerja e të gjitha marrëdhënieve politike dhe ekonomike me këtë regjim”, shtoi ai. Presidenti iranian tha se njerëzit në Rripin e Gazës të rrethuar po vuajnë tmerrësisht nga krimet e Izraelit, pavarësisht nga miratimi i fundit i një rezolute të Këshillit të Sigurimit të Kombeve të Bashkuara që kërkon një armëpushim të menjëhershëm.
Ai tha se regjimi sionist nuk i përmbahet jo vetëm kësaj rezolute, por edhe asnjë ligji, traktati dhe konvente ndërkombëtare dhe shkelja e më shumë se 400 deklaratave dhe rezolutave ndërkombëtare tregon natyrën agresive, jolegjitime dhe antinjerëzore të këtij regjimi. Raisi u bëri thirrje krerëve të shteteve myslimane që të marrin një masë vendimtare për të ndaluar gjenocidin e Izraelit në Palestinë.
Ai nënvizoi rëndësinë e rritjes së koordinimit midis vendeve anëtare të Organizatës së Bashkëpunimit Islamik dhe organeve të tjera rajonale dhe ndërkombëtare për të dërguar ndihma humanitare për popullin e Gazës. Presidenti i Turqisë, duke uruar qeverinë dhe popullin iranian për muajin e bekuar të Ramazanit, theksoi përkushtimin e qeverisë turke për ndjekjen dhe zbatimin e marrëveshjeve të arritura mes Iranit dhe Turqisë në Këshillin e Lartë të Bashkëpunimit mes dy vendeve./parstoday
