Bota

SHBA mirëpret dorëheqjen e Barzanit

Shtetet e Bashkuara të Amerikës (ShBA) shprehën kënaqësinë nga vendimi i kreut të administratës rajonale kurde të Irakut (KRG), Mesut Barzani për të mos marrë pjesë në garën për një mandat të ri në postin e presidentit.

Zëdhënësja e Departamentit amerikan të Shtetit, Hedhër Naurt (Heather Nauert) publikoi një komunikatë me shkrim në lidhje me çështjen.

Në komunikatë bëhet e ditur se “Shtetet e Bashkuara të Amerikës vlerësojnë lartë vendimin e kreut të administratës rajonale kurde të Irakut (KRG), Mesut Barzani për të mos marrë pjesë në garën për një mandat të ri dhe transferin e kompetencave të tij tek institucionet tjera nga ana e Parlamentit të KRG-së”.

Zëdhënësja Naurt në mes tjerash në komunikatën e saj shkruan kështu: “ShBA-të presin me padurim vendosjen e një kontakti aktiv me Kryeministrin e KRG-së, Neçirvan Barzani dhe Zëvendëskryeministrin Kubat Talabani. Një KRG e fortë është e pashmangshme për stabilitetin afatgjatë të Irakut të bashkuar dhe federal dhe për mundjen e organizatës terroriste DAESH”.

Zëdhënësja e Departamentit të Shtetit gjithashtu u bëri thirrje të gjitha partive politike të KRG-së për të kontribuar në zgjidhjen e problemeve në rendin e ditës.

Naurt vuri theksin se Kryeministri i Irakut, Haider al-Abadi hodhi hapa të rëndësishme në “luftën kundër DAESH-it” dhe “fillimin e një dialogu të ri me KRG-në”, ndërsa duke bërë thirrje për bashkëpunim mes Bagdadit dhe Erbilit ajo vuri theksin edhe në pritshmëritë për ti dhënë fund të gjitha konflikteve mes palëve.

 

 

 

 

 

 

 

 

 

 

 

OPINIONE

INTERVISTA