Nga Alireza Akbari
Rachel Griffin Accurso, një edukatore dhe argëtuese e njohur për fëmijë në YouTube, e cila ka folur me guxim kundër vuajtjeve të fëmijëve në Rripin e Gazës nën rrethim, është bërë shënjestër e sulmeve të ashpra nga grupe lobiste sioniste, të cilat e akuzojnë për përhapje të “propagandës pro-Hamas.” Njohur më së shumti si Ms. Rachel, një figurë shumë e dashur në internet, ajo ka përdorur platformën e saj jo vetëm për të edukuar fëmijët, por edhe për të ngritur zërin për çështje të të drejtave të njeriut – së fundmi, për fëmijët e Gazës gjatë luftës gjenocidale izraelito-amerikane që ka marrë mijëra jetë fëmijësh të pafajshëm.
Një grup famëkeq sionist e ka klasifikuar aktivizmin e saj si “antisemitizëm” dhe ka nisur një fushatë të egër shpifjesh ndaj saj, deri në atë pikë sa ka kërcënuar edhe me dhunë fizike. Postimet e Accurso në rrjetet sociale, ku shpreh simpati për fëmijët palestinezë, kanë zemëruar grupin që e quan veten StopAntisemitism. Por Ms. Rachel nuk ka treguar asnjë shenjë tërheqjeje.
Fushata e shpifjeve ndaj saj u përshkallëzua më tej me një letër drejtuar autoriteteve amerikane, ku kërkohet që ajo të hetohet nën Aktin për Regjistrimin e Agjentëve të Huaj (FARA) — një lëvizje e habitshme kundër një gruaje të njohur për përmbajtje edukative për fëmijë. Accurso vazhdon të bëjë atë që ka bërë gjithmonë: të flasë me gjuhën e kujdesit për ata që nuk mund të flasin vetë. Tani grupi ka përshkallëzuar edhe më tej, duke i bërë thirrje formalisht Departamentit Amerikan të Drejtësisë që të hetojë nëse Ms. Rachel “po paguhet për të përhapur propagandë në përputhje me Hamasin tek miliona ndjekësit e saj.”
Në letrën e tyre, grupi pretendon se postimet e saj në rrjetet sociale — të cilat përfshijnë imazhe prekëse të fëmijëve të kequshqyer dhe shifra të viktimave të publikuara nga ministria e shëndetësisë në Gaza — mund të përbëjnë “punë të papublikuar për një entitet të huaj.” “Duke marrë parasysh sasinë e madhe të fondeve të huaja të destinuara për propagandë në universitetet tona, dyshojmë se ekziston një dinamikë e ngjashme edhe në hapësirën e influencuesve online,” shkruan Liora Rez, drejtoreshë e StopAntisemitism, në letrën drejtuar zyrtarëve amerikanë.
Objeksionet e StopAntisemitism fokusohen në postime të veçanta ku Ms. Rachel ndau imazhe të fëmijëve të uritur në Gaza dhe citoi shifra të viktimave të publikuara edhe nga Kombet e Bashkuara. Sipas grupit, këto postime injoruan “vuajtjet e viktimave izraelite, pengjeve dhe fëmijëve hebrenj.” Kur gazetarë dhe aktivistë kërkuan prova të drejtpërdrejta që Ms. Rachel ishte paguar për këto postime – dhe se nuk po shprehte thjesht indinjatë morale – Liora Rez nuk ofroi asnjë dokumentacion.
Në vend të kësaj, ajo sugjeroi një “model”, duke thënë: “Nuk është sekret që influencues të tillë si Ms. Rachel shpesh kanë bashkëpunime të paguara në rrjete sociale… Ne s’mund të mos vërejmë që pas datës 7 tetor, ajo postoi një lumë propagande anti-Izrael.” Grupi po shtyn që ajo të hetohet sipas Ligjit për Regjistrimin e Agjentëve të Huaj (FARA) — një ligj që synon të identifikojë amerikanët që punojnë në interes të subjekteve të huaja politike.Por ekspertët ligjorë theksojnë se hetimet sipas FARA kërkojnë prova të qarta të pagesave nga një entitet i huaj — një prag që, sipas kritikëve, kjo fushatë nuk e arrin.
Fushata kundër saj vjen në një kohë kur bilanci i viktimave nga lufta gjenocidale e Izraelit në Gaza vazhdon të rritet. Deri në maj 2025, thuajse 20,000 fëmijë ishin vrarë, sipas burimeve lokale të shëndetësisë — një shifër tronditëse që përfshin mbi 900 foshnja nën moshën një vjeç. Uria gjithashtu ka marrë jetë fëmijësh: 52 persona, shumica fëmijë, kanë vdekur nga kequshqyerja si rezultat i përdorimit të ushqimit si armë nga Izraeli në këtë territor të rrethuar. Ministria e Shëndetësisë në Gaza raporton gjithashtu mbi 4,700 amputime — gati një e pesta në mesin e fëmijëve. Në këtë sfond tragjik, gjestet e heshtura të solidaritetit të Ms. Rachel filluan të rezonojnë. Gati një vit para se të niste fushata kundër saj, ajo kishte nisur një fushatë bamirësie në platformën Cameo, duke mbledhur mbi 50,000 dollarë për Fondin e Emergjencës së Save the Children brenda pak orësh.
Iniciativa ishte pjesë e një nisme më të gjerë të quajtur “Mesazhe dashurie për fëmijët, nga fëmijët”, ku ofronte video të personalizuara për ndjekësit e vegjël, dhe të gjitha të ardhurat shkonin për të ndihmuar fëmijët që po jetonin në luftë – në Gaza, Sudan, Republikën Demokratike të Kongos dhe Ukrainë. “Ideja është kjo: Unë do të bëj video për të vegjlit dhe të gjitha paratë që mblidhen do të shkojnë për Fondin e Emergjencës së Save the Children, që i ndihmon fëmijët që jetojnë në konflikte,” shpjegoi ajo në një video në llogarinë e saj në Instagram.
Mbështetja masive që mori u shoqërua menjëherë me një valë urrejtjeje dhe komentesh të politizuara. Ms. Rachel u përgjigj me një mesazh të thjeshtë por të fuqishëm moral:
“Të bësh një fushatë për fëmijët që po vdesin nga uria – që nuk kanë as ushqim as ujë – që po vriten – është njerëzore.” Reagimi kundër saj ka vënë në dukje taktikat që përdor StopAntisemitism.
Ky grup sionist është i njohur për rubrikën e tij “Antisemitisti i Javës” – një metodë e turpshme e “shaming”-ut publik që, sipas kritikëve, përdor pretendimin për antisemitizëm për të heshtur disidencën politike, sidomos kur bëhet fjalë për të drejtat palestineze. Megjithatë, Ms. Rachel ka qëndruar e palëkundur, duke përdorur platformën e saj për të theksuar humanitetin e fëmijëve palestinezë – në një kohë kur pjesa më e madhe e mediave perëndimore i trajtonte ata thjesht si numra. Sipas avokatëve të të drejtave të njeriut, qëndresa e saj e heshtur tronditi klasën mediatike.
“Ajo i trembi të gjithë në media,” u shpreh një aktivist. “Sepse tregoi se sa e thjeshtë – dhe e domosdoshme – është të humanizosh palestinezët. Ndërkohë që media tradicionale për gati 19 muaj ka bërë të kundërtën.” Më 12 maj 2025, Ms. Rachel ndau një postim prekës ku prezantonte me ndjekësit Rahaf, një vajzë palestineze 3-vjeçare që është kthyer në simbol të qëndresës. Në gusht 2024, në moshën vetëm 2-vjeçare, Rahaf humbi të dyja këmbët kur një sulm ajror izraelit shkatërroi shtëpinë e saj. Nëna e saj, Israa Saed, arriti ta sillte në SHBA për trajtim mjekësor me ndihmën e organizatës Palestine Children’s Relief Fund (PCRF).
Fotot në postim tregonin Ms. Rachel duke përqafuar butësisht Rahaf, të dyja me buzëqeshje të ndritshme. “Isha e nderuar që kalova kohë me Rahaf nga Gaza,” shkroi ajo. “Rahaf është një vajzë 3-vjeçare që ka humbur të dyja këmbët në një sulm ajror. Është absolutisht e mrekullueshme dhe vajza më e dashur, e zgjuar dhe lozonjare që kam takuar.” Në përshkrimin e postimit, Ms. Rachel shprehu empatinë e saj ndaj familjes së Rahafit, duke reflektuar mbi dhimbjen e paimagjinueshme të ndarjes dhe mbijetesës. “E imagjinova veten me telefonin në dorë në SHBA, me vajzën time që tani është pa këmbë nga një sulm ajror, larg djalit dhe burrit tim në Gaza, pa mundur t’i ushqej apo t’i mbroj.”
Gati dhjetë ditë më vonë, ajo ndau një video plot gëzim, ku ajo dhe Rahaf këndonin së bashku, të dyja me fjongo rozë në kokë.
“Kjo është shoqja ime Rahaf, nga Gaza. Takimi me të dhe me mamin e saj të mrekullueshëm më ndryshoi jetën,” shkroi ajo, duke falënderuar organizatën PCRF që bëri të mundur takimin. Ajo iu drejtua audiencës me një pyetje prekëse:
“Kur dëgjoni për mijëra e mijëra fëmijë të vrarë në Gaza, a dëgjoni vetëm një statistikë, apo mendoni për fëmijë të veçantë si Rahafi i çmuar?”
“Kur dëgjoni për fëmijë që po bllokohen nga ndihmat, a mendoni për fëmijë të ëmbël si Rahaf që po bëhen të kequshqyer?”
Në rreshtat përmbyllës, ajo e bëri të qartë çështjen morale:
“Të përpiqesh ta bësh të diskutueshme mbrojtjen e këtyre fëmijëve dhe të qëndrosh në heshtje, do të thotë se po thua që jeta e disa fëmijëve vlen më shumë se e të tjerëve. Kjo është racizëm anti-palestinez.” Postimi me Rahafin ishte vetëm një nga shumë thirrje të ndjera nga edukatorja e YouTube-it për fëmijë, që i bënte botës thirrje të shihte, dëgjonte dhe më në fund të vepronte.
Në postime të tjera, ajo ndau historinë rrëqethëse të Hind Rajab, një vajzë palestineze 5-vjeçare, zëri i dëshpëruar i së cilës u dëgjua në një telefonatë urgjente – fjalët e saj të fundit para se të vritej brenda një makine nga një tank ushtarak izraelit në janar 2024 në Gaza. Edhe ajo foto u publikua në llogarinë e Ms. Rachel në Instagram. Por Ms. Rachel nuk është ndalur vetëm tek tragjeditë individuale — ajo e ka kthyer profilin e saj në një akt moral të fortë kundër heshtjes kolektive.
Më 27 maj, ajo bëri një thirrje të zjarrtë për udhëheqësit botërorë, duke dënuar rënien morale të atyre që dikur pretendonin se qëndronin në mbrojtje të të drejtave të njeriut.
“Ndjeni turp nga heshtja,” shkroi ajo. “Ndjeni turp që keni parë të njëjtat pamje dhe video si ne dhe nuk ju kanë shtyrë të bëni gjënë e duhur. Ndjeni turp që zakonisht ngrini zërin për fëmijët dhe të drejtat e njeriut, por tani nuk e bëni – sepse këta fëmijë janë palestinezë.” Mesazhi i saj ishte i mbushur me frustrim ndaj indiferencës së pushtetarëve dhe racizmit që ajo beson se qëndron në themel të kësaj indiference. Ajo e quajti këtë sjellje:
“racizëm anti-palestinez.”
Në një tjetër postim të së martës, zëri i saj u bë më i dëshpëruar. Duke mbajtur foshnjën e saj të porsalindur në krahë në një video, ajo u lut ndaj udhëheqësve botërorë të ndërhyjnë, duke përsëritur paralajmërimin e Kombeve të Bashkuara se 14,000 foshnja mund të vdesin në Gaza brenda 48 orëve, nëse bllokada izraelite nuk hiqet. “Ju lutem të gjithëve, thoni diçka për këta foshnja. Ju lutem, liderë, thoni diçka,” shkroi ajo, duke ndarë imazhe të fëmijës së saj dhe një foshnje palestineze të uritur. Kontrasti ishte tronditës.
Dhe ajo nuk ndaloi me kaq.
“Ndjeni turp që qytetarët tuaj po ju luten me dëshpërim që të flisni, dhe ju qëndroni në heshtje,” vazhdoi ajo.
“Edhe personazhet e famshëm. Nëse të gjithë thonë diçka, nuk do të jetë më ‘kontrovers’. Është bërë e gabuar të thuash që është e gabuar të vdesin fëmijët nga uria dhe bombardimet.”/gazetaimpakt/presstv.ir
