Të burgosurit i vënë flakën ambienteve të paraburgimit në Vlorë

Ambientet e paraburgimit në Vlorë u përfshinë nga flakët dje pasdite
. Sipas drejtorisë së përgjithshme të burgjeve, fillimisht ka patur një konflikt fizik midis disa personave me rekorde kriminale.
Pasi është bërë izolimi i grupeve, shokët e qelive në shenjë proteste i kanë vënë flakën dyshekëve të dhomave në katin e dytë dhe të tretë. Në vendngjarje mbërritën forca zjarrëfikëse dhe autoambalancat e spitalit të qytetit.
Dy gardianë janë transportuar në spital të asfiksuar nga tymi. Një grup hetimor pritet të zbardhë ngjarjen kurse zjarri është fikur totalisht dhe situata është drejt normalizimit.