Kryetarja e Shtetit të Kosovës u bojkotua hapur në sallën e parlamentit nga kryeministri Rama dhe gati gjysma e qeverisë shqiptare në shenjë hakmarrje për qëndrimet e saj, të cilat ajo ia tha në sy shefit të qeverisë shqiptare si “shentgeni ballkanik” që shkon për interesat serbe si dhe “tentativat për shkëmbime territori” të cilët e udhëheq presidenti serb.
Presidentja në Detyrë e Kosovës, Vjosa Osmani ka mbajtur dje një nga fjalimet më të forta që një politikan i Prishtinës ka bërë ndonjëherë në Tiranë. Politikania e re, ka pasur kurajën t’u thotë përfaqësuesve të qeverisë në Tiranë, disa të vërteta të hidhura për mënyrën sesi është sjellë këto 7 vite shteti shqiptar në raport me Kosovën. Nga salla e Kuvendit të Shqipërisë, Osmani goditi idenë e shkëmbimit të territoreve të Kosovës me Serbinë, duke e cilësuar si një projekt të rrezikshëm. Duke thënë se “Serbia nuk mund të shpërblehet për krime me territore”, Osmani ka shigjetuar direkt dhe politikanët në Shqipëri që e kanë mbështetur këtë tezë të Beogradit. Kryeministri Edi Rama është i pari që renditet në Tiranë në këtë listë, si njeriu që në mënyrë indirekte e përkrahu tezën e shkëmbimit të territoreve. Ndaj dhe thirrja e Vjosa Osmanit që të mos luhet me idenë e territoreve shkonte direkt për kryeministrin e Shqipërisë. Një tjetër pikë që u prek gjatë fjalimit nga Vjosa Osmani është ajo e Rezolutës për Dënimin e Krimeve Serbe nga Kuvendi i Shqipërisë. Qeveria “Rama” ka ngritur komision hetimor për krimet duke e përdorur si mjet sulmi ndaj kreut të opozitës, Lulzim Basha, por nuk ka asnjë dokument ku Parlamenti ynë të dënojë krimet serbe. Thirrja e Vjosa Osmanit për rezolutën vjen dhe si një apel që Kosova të mos përdoret për luftë të brendshme politike qeveri-opozitë në Shqipëri.
Presidentja në detyrë e Kosovës ka folur qartë dhe për pengesat që këto vite janë vendosur mes dy vendeve për ekonominë dhe lëvizjen e lirë të njerëzve. Pengesa që është ngritur mes dy shteteve nga qeveria “Rama” është një vijë ndarëse që nuk i shërben bashkimit ekonomik dhe komunikimit njerëzor mes dy shteteve. “Kosova nuk ka nevojë për tra të vendosur nga Shqipëria”,- tha Vjosa Osmani duke i dërguar një mesazh direkt Edi Ramës. Vjosa Osmani ka shigjetuar dhe projektin e Minishengenit Ballkanik, në të cilin qeveria “Rama” është përfshirë me zell duke përjashtuar dhe Kosovën nga pjesëmarrja. Osmani u shpreh se Serbia nuk ka ndryshuar në qëllimet e saj kundër shqiptarëve dhe Kosova dhe Shqipëria kanë detyrë të flasin me një zë për çështjet që lidhen me interesat kombëtare.
Fjalimi i sotëm në Kuvend dhe mesazhet e tjera që dha Vjosa Osmani në Tiranë gjatë vizitës zyrtare, lidheshin në shumicën e tyre me politikën e gabuar që Edi Rama po ndjek ndaj Kosovës. Minishengenin, shkëmbimi i territoreve, tarifat e vendosura mes dy vendeve janë çështje që mbajnë të gjitha firmën e Edi Ramës. Atë që Edi Ramës ja kanë thënë në mënyrë indirekte mediat në Kosovë dhe politikanë të caktuar, Vjosa Osmani pati kurajën t’ja thotë në cilësinë e kryetares së shtetit në Kosovës. Kritikat janë gjithmonë të hidhura, por klasa politike në Kosovë dhe modeli i politikanes që përfaqëson Vjosa Osmani vendosi një vijë të qartë ndarje me politikën rilindase. Pushteti i radhës politik në Tiranë që drejton shtetin nuk mund të luajë me interesat e Kosovës dhe aq më pak ta përdorë atë për hallet personale që ka Rilindja. Këto qëndrime të Vjosa Osmanit gjatë vizitës në Tiranë duket se kanë acaruar kreun e qeverisë Edi Rama deri në pikën që vendosi të thyejë protokollin shtetëror. Në fjalimin e mbajtur nga Osmani në Kuvendin e Shqipërisë mungoi kryeministri Edi Rama si gati gjysma e qeverisë së tij. Mungesa nuk ishte e rastësishme dhe duke parë qëndrimet e Presidentes së Kosovës duket se Edi Rama vendosi të bojkoti vizitën e saj. Ky është një gjest i turpshëm dhe i pajustifikueshëm. Çdo qeveri dhe kryeministër i Shqipërisë e ka detyrë të zhvillojë raportin special të marrëdhënieve Shqipëri-Kosovë. Është detyrë kombëtare dhe jo thjesht shtetërore. Edi Rama zgjodhi dje të bëj akte feminore duke bojkotuar fjalimin e Presidentes së Kosovës dhe duke zhvilluar vetëm një takim formal në Kryeministri. Kryeministrit të Shqipërisë nuk i ka hije një sjellje e tillë dhe akte vetëm se turpërojnë shtetin tonë.
