Turqia kritikon vizitën e ndërlidhur me YPG/PKK-në terroriste në Moskë

Turqia kritikoi vizitën në Moskë nga një grup i lidhur me YPG/PKK-në terroriste, duke thënë se Rusia duhet të shmangë hapat që i shërbejnë interesave të terroristëve që kërcënojnë si Turqinë ashtu edhe Sirinë.

“Ne jemi të shqetësuar që një grup i përbërë nga elementë të të ashtuquajturit ‘Këshilli Demokratik Sirian’, i udhëhequr nga grupi terrorist PKK/YPG, do të ftohet në Federatën Ruse dhe do të pranohet në një nivel të lartë nga zyrtarët rusë”, thuhet në një deklaratë të Ministrisë së Punëve të Jashtme (MPJ) të Turqisë.

Sipas raportimeve në deklaratë, takimi mund të ketë ndodhur tashmë.

“Ne presim që Federata Ruse të veprojë në përputhje me frymën e Astanas (procesit të paqes për Sirinë) dhe angazhimet e marra në takimet e formatit të Astanas, si dhe të shmangë hapat që do t’i shërbejnë agjendës së grupeve të lidhura me PKK/YPG-në”, thuhet gjithashtu në deklaratë.

MPJ e Turqisë e përshkruan PKK/YPG si “një grup terrorist që persekuton komunitetet lokale në zonat që de-fakto i ka nën kontroll dhe cënon integritetin territorial të Sirisë, si dhe kërcënon sigurinë kombëtare të fqinjëve të Sirisë, veçanërisht Turqisë.”

Që nga viti 2016, ushtria turke ka filluar operacione ndërkufitare në veri të Sirisë për të çliruar vendasit nga sundimtarët terroristë të YPG/PKK dhe për të mbrojtur Turqinë nga një korridor terrorist në kufijtë e tij.

Në njoftimin e ministrisë thuhet se luftimi i terrorizmit në të gjitha format e tij dhe qëndrimi kundër agjendave separatiste që dëmtojnë sigurinë kombëtare të vendeve fqinje si dhe integritetin territorial të Sirisë është një angazhim i përbashkët i bërë në deklaratat e përbashkëta të lëshuara në fund të takimeve të nivelit të lartë të mbajtur në formatin e Astanasë.

“Në një deklaratë të përbashkët të bërë si rezultat i takimit të mbajtur nga garantuesit e Astanasë në Gjenevë më 25 gusht 2020, u deklarua një qëndrim i përbashkët kundër agjendave separatiste të formacioneve jolegjitime”, shtohet në deklaratë.

Më 25 gusht, Turqia, Rusia dhe Irani riafirmuan angazhimin e tyre për sovranitetin, pavarësinë, unitetin dhe integritetin territorial të Sirisë në një deklaratë të përbashkët në kufijtë e takimit të tretë të Komitetit Kushtetues të Sirisë të mbajtur në Gjenevë.

Në njoftim thuhet se Turqia do të përcjellë pakënaqësinë e saj me takimin përmes një delegacioni të udhëhequr nga zv/ministri i Punëve të Jashtme, Sedat Önal, i cili po viziton Moskën për konsultime politike.

Në fushatën e saj terroriste mbi 30 vjeçare kundër Turqisë, PKK, e radhitur si një organizatë terroriste nga Turqia, SHBA dhe BE, ka qenë përgjegjëse për vdekjen e 40,000 njerëzve, përfshirë gra, fëmijë dhe foshnje. YPG është dega e PKK-së në Siri.

Siria është përfshirë në një luftë të egër civile që nga fillimi i vitit 2011 kur regjimi i Bashar al-Assadit goditi protestat pro-demokracisë me një egërsi të papritur.

Që nga ajo kohë, mbi 5 milion civilë janë shpërngulur. Turqia strehon 3.6 milion prej tyre, më shumë se çdo vend tjetër në botë./AA

NDANI KËTË POSTIM

Mund tju interesojne