Nëpërmjet operacioneve ajrore, forcat turke kanë shënjestruar streha terroriste në Irakun verior këtë javë, duke shkatërruar gjithsej 31 objektiva dhe duke “neutralizuar” anëtarë të lartë të grupit terrorist, njoftoi Ministria e Mbrojtjes e Turqisë.
“Për të neutralizuar PKK/KCK-në dhe elementë të tjerë terroristë dhe për të penguar sulmet terroriste kundër popullit tonë dhe forcave të sigurisë nga Iraku verior duke garantuar sigurinë tonë kufitare, u kryen operacione ajrore ndaj objektivave terroriste në rajonin Gara të Irakut verior më 13-15 shtator”, tha ministria në një deklaratë.
Objektivat e shkatërruara përfshijnë shpella, strehimore dhe depo të përdorura nga terroristët, tha ministria, duke vënë në dukje se disa nga këto vende mendohet se strehonin terroristë të lartë.
Ministria e Mbrojtjes nënvizoi se një numër i konsiderueshëm terroristësh u “neutralizuan” gjatë operacioneve, duke përdorur në masën maksimale municione të prodhimit vendas.
Më tej thuhet se sulmet u kryen në përputhje me “të drejtën e Turqisë për vetëmbrojtje sipas nenit 51 të Kartës së OKB-së” dhe se “u morën të gjitha masat për të siguruar që civilët e pafajshëm, elementët miqësorë, pasuritë historike dhe kulturore, si dhe si mjedisi, të mos dëmtohen”.
Në fushatën e saj terroriste më shumë se 35-vjeçare kundër Tirqisë, PKK – e listuar si organizatë terroriste nga Turqia, SHBA-ja dhe BE-ja – ka qenë përgjegjëse për vdekjen e më shumë se 40.000 njerëzve, duke përfshirë gra, fëmijë dhe foshnja.
Terroristët e PKK-së shpesh fshihen përtej kufirit, në Irakun verior, për të organizuar sulme./AA
