Qeveria e Nicolas Maduros e ka shpallur person “non grata” ambasadorin e Gjermanisë në Venezuelë, Daniel Kriener, dhe e ka urdhëruar atë të largohet nga Venezuela brenda 48 orësh.
Lajmin për dëbimin e ambasadorit gjerman e ka bërë të ditur përmes një postimi në Twitter ministri i jashtëm venezuelas, Jorge Arreaza. Ambasadori Kriener ka qenë i zgjedhur në këtë pozitë që nga viti i kaluar.
Ministri Arreaza tha se vendimi për dëbimin e ambasadorit gjerman është marrë për shkak të ndërhyrjeve të përsëritura të tij në çështjet e brendshme të Venezuelës.
Përmes një deklarate, qeveria e Maduros e ka akuzuar këtë ambasador dhe qeverinë gjermane për ndërhyrje ilegale në punët e Venezuelës. Përndryshe, Gjermania është në mesin e shteteve që e kanë njohur Juan Guaidon si president të përkohshëm të Venezuelës.
Ambasadori Kriener ishte në mesin e diplomatëve të huaj që kishin shkuar në aeroport për ta përshëndetur Guaidon, i cili ishte kthyer nga një udhëtim në disa shtete të Amerikës Jugore, shkruan “The Guardian”.
