Kisha Ortodokse e ka kundërshtuar këtë masë, duke thënë se ligji paraqet shkelje të lirisë së fesë dhe shembull të ndërhyrjes shtetërore në çështjet fetare.
Presidenti i Ukrainës, Petro Poroshenko, ka nënshkruar një ligj që shkel lirinë e fesë dhe që përbën një shembull të ndërhyrjes shtetërore në çështjet fetare. Me anë të këtij ligji presidenti ukrainas e detyron Kishën Ortodokse të Patriarkanës së Moskës të vendosë një emër që e tregon lidhjen me Kishën Ortodokse Ruse që gjendet në Moskë. Ligji kërkon që kjo lidhje të bëhet e qartë edhe përmes emrit.
Ligji i ri po vlerësohet si përpjekja më e re e Ukrainës për ta krijuar kishën e vet ortodokse, plotësisht të pavarur nga Moska. Në tetorin e kaluar, Patriarku i Parë i Stambollit e shfuqizoi një rregull shekullor që e vendoste Kishën Ortodokse Ukrainase nën varësinë e Patriarkanës së Moskës. Në kundërpërgjigje të këtij vendimi, Kisha Ortodokse Ruse i ndërpreu marrëdhëniet me patriarkun e Stambollit.
Poroshenko deklaroi se ligji i ri do ta bënte më të lehtë për besimtarët ortodoksë që të zgjedhin mes kishës së re dhe kishës së varur nga Moska. “Është më e lehtë të bëhet zgjedhja kur gjërat thirren me emrat e tyre”, tha ai. Në anën tjetër, Kisha Ortodokse e ka kundërshtuar këtë masë, duke thënë se ligji paraqet shkelje të lirisë së fesë dhe shembull të ndërhyrjes shtetërore në çështjet fetare, shkruan “Free Europe”, transmeton Gazeta Express.