Kreu i Partisë Demokratike, Sali Berisha, ka reaguar ashpër ndaj një kërcënimi të raportuar nga Erion Veliaj, duke e cilësuar atë si një akt të pashembullt të pengimit të drejtësisë dhe kërcënim të dëshmitarëve. Sipas Berishës, ky veprim është një shenjë e frikës dhe përpjekjes për të fshehur krimet, duke sulmuar në mënyrë personale individët që guxojnë të flasin dhe të zbardhin të vërtetën.
“Unë e dënoj me forcën më të madhe aktin kriminal të Erion vjedhësit, Erion hajdutit, kërcënimin ndaj personelit të Olsi Dados. Ky nuk është thjesht një kërcënim personal, ky është një mesazh i rrezikshëm për të gjithë ata që guxojnë të denoncojnë krimet. Kërcënimi i tij është i drejtuar ndaj dëshmitarëve, të cilët janë ata që kanë merita dhe që po ndihmojnë drejtësinë. Ky është një akt i rëndë i pengimit të drejtësisë,” tha Berisha.
Ai gjithashtu e akuzoi Veliajn për përpjekje për të shpëtuar nga krimet e tij dhe theksoi se nëse ky vazhdon të kërcënojë dëshmitarët, do të përballet me pasojat e rënda ligjore. “PD po shqyrton modalitetet për ta paditur për këto veprime, që janë një formë e shfaqur e frikës dhe korrupsionit në sistemin e drejtësisë,” shtoi Berisha.
Veliaj, i cili është përballur me akuza të shumta dhe spekulime për lidhjet e tij me pasuri dhe investime të dyshimta, ka qenë objekt i kritikave të shumta nga opozita. Berisha theksoi se nuk do të lejohet që askush të mbulojë krimet dhe të manipulojë drejtësinë për interesat e tij.
“Me asgjë nuk mund të shpëtosh nga krimet që ke bërë, Veliaj. Mos guxo të kërcënosh dëshmitarët, sepse do të përgjigjesh shumë rëndë,” përfundoi Berisha./gazetaimpakt
