Forcat izraelite vranë një palestinez dhe plagosën 13 të tjerë në Bregun Perëndimor të pushtuar. Sipas lajmit të agjencisë zyrtare palestineze WAFA, një palestinez ka humbur jetën në bastisjen e kryer nga ushtarët izraelitë në qytetin e Ramallahut.
Sipas informacionit të marrë nga dëshmitarët okularë, ushtria izraelite bastisi shumë lagje dhe një dyqan këmbyesi parash në qytetin Ramallah. Mes ushtarëve izraelitë dhe palestinezëve të cilët reaguan ndaj incidentit pati përleshje. Forcat izraelite bastisën gjithashtu qytetet e pushtuara të Bregut Perëndimor, Nablus, Jenin, Tulkerim, Betlehem, Khalil dhe Jericho.
Në deklaratën nga Gjysmëhëna e Kuqe Palestineze thuhet se 13 palestinezë të lënduar nga sulmet e ushtarëve izraelitë janë trajtuar nga ekipet mjekësore. Ndërsa forcat izraelite kanë bombarduar rëndë Gazën që nga 7 tetori, ka pasur një rritje të ndalimeve dhe bastisjeve ndaj palestinezëve në Bregun Perëndimor të pushtuar dhe Kudsin Lindor.
Gjatë kësaj periudhe, 313 palestinezë humbën jetën në sulmet e forcave izraelite dhe kolonëve të paligjshëm hebrenj në Bregun Perëndimor të pushtuar dhe Kuds./AA
