Gazetari Gjergji Thanasi ka ironizuar marrëveshjen e bashkëpunimit mes Shqipërisë dhe Izraelit në fushën e Shëndetësisë. Sipas njoftimit të Ministrisë Qendra Spitalore Universitare “Nënë Tereza” është binjakëzuar me qendrën spitalore më të madhe izraelite, “Sheba Medical Center”, duke e cilësuar si partneritet strategjik i cili do të kontribuojë në rritjen e standardeve të shërbimeve shëndetësore për qytetarët shqiptarë.
“Thellohen edhe me tej maredheniet e gjithanshme Shqiperi – Izrael!”, shkruan Gazetari Thanasi.
Në lajmin e publikuar nga Portali “Izraeli sot”, Ministrja e Shëndetësisë Albana Koçiu e quajti privilegj dhe arritje këtë binjakëzim.
“Për ne, është vërtetë një privilegj i jashtëzakonshëm të punojmë me një qendër spitalore të këtij niveli, e njohur për cilësinë, profesionalizmin dhe inovacionin që sjell në kujdesin ndaj pacientit. Por, ky është edhe një privilegj që në vijim duhet ta meritojmë, duke rritur hap pas hapi cilësinë e shërbimit të ofruar, si dhe përqafuar këtë mundësi të jashtëzakonshme që i ofrohet stafit tonë mjekësor, veçanërisht gjeneratës së re të mjekëve. Ndaj dua t’i ftoj ata që të shfrytëzojnë këtë mundësi për t’u trajnuar dhe bashkëpunuar me këtë qendër që në një vit trajton 2 milionë pacientë nga e gjithë bota, e që mbështet me mijëra studime shkencore e kërkime klinike”, tha Koçiu.
Ministrja Koçiu theksoi se gur themeli i bashkëpunimit mes dy vendeve është mbështetja për reformimin e shërbimit të Spitalit Onkologjik bazuar në përvojat më të mira ndërkombëtare të menaxhimit. “Falë marrëveshjes së nënshkruar me “Sheba Medical Center, ekspertë të këtij spitali do të atashohen në Spitalin Onkologjik duke asistuar mjekët tanë në trajtimin e rasteve të vështira, në kohë reale përmes telemjekësisë. Pikë tjetër e dakordësuar në këtë marrëveshje është ofrimi i trajnimeve dhe njohja e mjekëve e infermierëve tanë me terapitë dhe pajisjet më inovative. Kjo marrëveshje bashkëpunimi e QSUNT me spitalin prestigjioz “Sheba”, ecën paralel me projektin madhor të Autonomisë Spitalore dhe Praktikave të Dyfishta për mjekët”, shprehet ministrja e Shëndetësisë dhe Mbrojtjes Sociale, Albana Koçiu./GazetaImpakt/
