Tre pengje izraelite, Alexander Sasha Troufanov, Sagui Dekel-Chen dhe Yair Horn, janë liruar sot, më 15 shkurt, nga Hamas në Khan Younis të Gazës, në raundin e gjashtë të shkëmbimit të të burgosurve midis dy palëve që nga hyrja në fuqi e armëpushimit më 19 janar. Lirimi i tyre u shoqërua me pankarta që mbanin mesazhe simbolike si “Nuk ka migrim përveç në Jerusalem” dhe “O Jerusalem, dëshmo: Ne jemi ushtarët e tu”, duke nënvizuar tensionet dhe ndjeshmëritë e larta rreth qytetit të shenjtë.
Në këmbim të tri pengjeve izraelite, Izraeli pritet të lirojë mbi 300 të burgosur palestinezë që mbahen aktualisht në burgjet izraelite, duke përfshirë gra dhe të mitur. Ky shkëmbim shënon një tjetër hap në përpjekjet e vazhdueshme për të zbutur konfliktin mes Izraelit dhe Hamasit, edhe pse situata mbetet e brishtë dhe me tensione të vazhdueshme.
Armëpushimi i arritur më 19 janar, pas ndërmjetësimit ndërkombëtar, ka sjellë një lehtësim të përkohshëm, por dhuna dhe mosmarrëveshjet ende nuk janë shuar. Ky shkëmbim i fundit tregon gatishmërinë e të dyja palëve për lëshime të ndërsjella, ndërsa bisedimet për një marrëveshje më të gjerë vazhdojnë. Megjithatë, realiteti në terren mbetet kompleks, me familjet e pengjeve që kërkojnë kthimin e të dashurve të tyre dhe me palestinezët që shpresojnë për lirimin e më shumë bashkëqytetarëve të tyre nga burgjet izraelite./gazetaimpakt
