Grupi palestinez Hamas hodhi poshtë miratimin e rezolutës nga Këshilli i Sigurimit të OKB-së të hartuar nga SHBA-ja që autorizon një Bord Paqeje dhe një Forcë Ndërkombëtare Stabilizimi (ISF) në Rripin e Gazës. “Rezoluta imponon mekanizëm ndërkombëtar të kujdestarisë në Rripin e Gazës, të cilin populli ynë dhe fraksionet e tyre e refuzojnë”, tha grupi në Telegram. Deklarata erdhi menjëherë pasi rezoluta u miratua me 13 vota pro, ndërsa Rusia dhe Kina abstenuan.
“Caktimi i forcës ndërkombëtare me detyra dhe role brenda Rripit të Gazës, përfshirë çarmatosjen e rezistencës, e zhvesh atë nga neutraliteti i saj dhe e shndërron atë në një palë në konflikt në favor të pushtimit”, shtoi grupi. Muajin e kaluar, Izraeli dhe Hamasi pranuan fazën fillestare të planit 20-pikësh të presidentit të SHBA-së, Donald Trump për Gazën, një armëpushim për të ndaluar luftën dyvjeçare dhe një marrëveshje që parashikon lirimin e pengjeve.
Rezoluta përcakton që “pranitë e Bordit të Paqes dhe Forcës së Stabilizimit Ndërkombëtar të autorizuara nga kjo rezolutë do të mbeten të autorizuara deri më 31 dhjetor 2027, në varësi të veprimeve të mëtejshme nga Këshilli, dhe (që) çdo riautorizim i mëtejshëm i Forcës së Sigurisë Ndërkombëtare të jetë në bashkëpunim dhe koordinim të plotë me Egjiptin, Izraelin dhe shtetet e tjera anëtare që vazhdojnë të punojnë me Forcën e Sigurisë Ndërkombëtare”.
Hamasi tha se çdo forcë ndërkombëtare, “nëse krijohet, duhet të vendoset vetëm në kufij për të ndarë forcat, për të monitoruar armëpushimin dhe duhet të jetë plotësisht nën mbikëqyrjen e OKB-së”. SHBA-ja falënderoi Këshillin e Sigurimit prej 15 anëtarësh për miratimin e rezolutës dhe vendet që mbështetën përpjekjet, përfshirë Katarin, Egjiptin, Emiratet e Bashkuara Arabe, Arabinë Saudite, Indonezinë, Turqinë dhe Jordaninë./AA
