Grupi jemenas Huthi paralajmëroi të martën se do të vazhdojë sulmet ndaj anijeve izraelite që kalojnë nëpër ujërat e afërta, pavarësisht njoftimit për themelimin e një koalicioni ndërkombëtar të udhëhequr nga SHBA-ja kundër tyre në Detin e Kuq. Anëtari i lartë i Huthive, Mohammad Abdulsalam, në një deklaratë në X tha se sulmet kanë për qëllim të mbështesin palestinezët ndërsa ata përballen me “agresionin dhe rrethimin” e Izraelit në Gaza.
Ai shtoi se operacionet e Jemenit nuk ishin sfidë për një palë tjetër, por theksoi se çdo palë që kërkon të zgjerojë konfliktin “duhet të mbajë përgjegjësi për pasojat e veprimeve të saj”.
“Koalicioni i formuar nga SHBA-ja duhet të mbrojë Izraelin dhe militarizimin e Detit (të Kuq) pa asnjë justifikim dhe nuk do ta ndalojë Jemenin të vazhdojë operacionet e tij legjitime në mbështetje të Gazës”, tha Abdulsalam.
“Meqë SHBA-ja u përcaktua për të mbështetur Izraelin, popujt e rajonit kanë legjitimitet të plotë që të mbështesin popullin palestinez”, tha Abdulsalam. Jemeni e ka marrë përsipër të qëndrojë në krah të së drejtës palestineze.
Të hënën, sekretari i Mbrojtjes së SHBA-së, Lloyd Austin njoftoi formimin e një misioni shumëkombësh nën emrin “Operation Prosperity Guardian”, kundër sulmeve të Huthive ndaj anijeve tregtare në Detin e Kuq.
Austin e përshkroi këtë si “një iniciativë e re shumëkombëshe e rëndësishme e sigurisë nën ombrellën e Forcave të Kombinuara Detare dhe udhëheqjen e Task Forcës së saj 153, e cila fokusohet në sigurinë në Detin e Kuq”. Deti i Kuq është një nga rrugët detare më të përdorura në botë për dërgesat e naftës dhe karburantit.
Huthit të mbështetur nga Irani në Jemen kanë rritur ndjeshëm përfshirjen e tyre në konfliktin aktual në Rripin e Gazës duke goditur anijet në jug të Detit të Kuq dhe duke paralajmëruar se do të sulmojnë të gjitha anijet që kanë për destinacion Izraelin./AA
