Gazeta amerikane “Washington Post” (WP) raporton se Izraeli ka sulmuar ambulancën e Gjysmëhënës së Kuqe Palestineze që shkoi për të marrë vajzën 6-vjeçare palestineze Hind Rajab. “WP” publikoi një analizë të imazheve satelitore, regjistrimeve, videove dhe fotografive lidhur me sulmin ndaj vajzës Hind Rajab dhe të afërmve të saj, të cilët u lanë të vdisnin në një automjet të shënjestruar nga forcat izraelite ndërsa po udhëtonin në Rripin e Gazës më 29 janar.
Në analizë u tha se Izraeli qëlloi ambulancën e Gjysmëhënës së Kuqe Palestineze, e cila u nis për të ndihmuar Hind Rajab dhe 15-vjeçaren Leyan Hamade, të cilat u plagosën në automjet dhe për të cilët nuk mund të merrej lajm. Analiza thekson se gjurmët e gjetura në ambulancë u përkisnin armëve izraelite dhe se automjetet e blinduara që i përkisnin ushtrisë izraelite ishin në zonën e sulmit në ditën e incidentit.
Zëdhënësi i Departamentit Amerikan të Shtetit, Matthew Miller deklaroi se në kundërshtim me analizën, Izraeli bëri një deklaratë se nuk ishte në rajon gjatë ngjarjeve të 29 janarit. “Ne do të marrim informacionin e publikuar në ‘Washington Post’ dhe do të pyesim Izraelin përsëri për situatën”, tha ai. Duke e përshkruar vdekjen e Hind Rajabit si “një tragjedi që nuk duhet të kishte ndodhur kurrë”, Miller tha se ata e mirëpritën hetimin gjithëpërfshirës për incidentin./AA
