Kancelari gjerman, Olaf Scholz, ka përshkruar NATO-n si aleancën “më të suksesshme” të sigurisë në histori dhe në skenën globale. Duke folur me gazetarët në margjinat e samitit në Washington, Scholz tha se ngjarja, e cila shënon 75-vjetorin e NATO-s, vjen në një kohë “shumë të veçantë”.

Duke theksuar se Evropa po përballet me luftën e Rusisë kundër Ukrainës, që kërcënon paqen dhe rendin e sigurisë, Scholz tha se NATO-ja ka qenë një aleancë e “suksesshme” për paqen dhe sigurinë për 75 vjet.

Scholz u zotua se Gjermania do të shpenzojë 2 për qind të prodhimit të saj të brendshëm bruto (PBB) për mbrojtjen dhe theksoi se pas vitit 2027, kur të jetë shteruar fondi i posaçëm prej 100 miliardë eurosh i ndarë nga qeveria gjermane për mbrojtjen, rreth 80 miliardë euro do të mbulohen nga buxheti për shpenzimet e mbrojtjes.

Kancelari gjerman tha se shpenzimet e mbrojtjes pothuajse do të dyfishohen krahasuar me një dekadë më parë. Ai gjithashtu garantoi liderët e tjerë se Gjermania do të tërheq peshën e saj në aleancën ushtarake pasi është “vendi më i madh në Evropë brenda aleancës së NATO-s”.

“Kjo na jep një përgjegjësi shumë të veçantë. Dhe këtë mund ta them shumë qartë dhe pa mëdyshje këtu. Ne do ta përmbushim këtë përgjegjësi”, tha Scholz./AA