Qeveria e Kilit njoftoi të mërkurën se ka vendosur të tërheqë atashetë e saj ushtarakë, të mbrojtjes dhe të forcës ajrore nga ambasada kiliane në Tel Aviv, duke përmendur situatën e rëndë humanitare që përjeton populli palestinez në Rripin e Gazës.
Në një deklaratë zyrtare, Ministria e Punëve të Jashtme bëri të ditur se vendimi është koordinuar me Ministrinë e Mbrojtjes dhe tashmë i është komunikuar autoriteteve izraelite.
Deklarata thekson se kjo masë vjen si përgjigje ndaj “situatës jashtëzakonisht të rëndë humanitare që përjeton popullsia palestineze”, duke përmendur gjithashtu “operacionin ushtarak të pakontrolluar dhe joproporcional të ushtrisë izraelite” si dhe “pengesat e vazhdueshme për lejimin e ndihmës humanitare” në territorin e rrethuar.
Sipas faqes zyrtare të ministrisë, zyrtarët që do të largohen përfshijnë atasheun e Mbrojtjes dhe Forcës Ajrore, kolonel Christian Stuardo Nunez; atasheun ushtarak, kolonel Marcelo Elo Rodriguez; dhe atasheun detar, kapiten Pedro Perez Flores.
Kjo lëvizje është pjesë e një përkeqësimi të vazhdueshëm të marrëdhënieve diplomatike midis administratës së presidentit Gabriel Boric dhe Izraelit. Mospajtimet filluan në vitin 2022, kur Boric refuzoi të pranojë letrat kredenciale të ambasadorit izraelit, dhe u intensifikuan në prill 2024 kur Kili përjashtoi Izraelin nga Panairi Ndërkombëtar i Aviacionit dhe Hapësirës (FIDAE).
Në nëntor 2023, Boric e tërhoqi ambasadorin kilian nga Izraeli për konsultime pas bombardimit të një kampi refugjatësh dhe shprehu mbështetjen për padinë e ngritur nga Afrika e Jugut ndaj Izraelit në Gjykatën Ndërkombëtare të Drejtësisë (ICJ).
Në deklaratën e fundit, qeveria kiliane përsëriti kërkesën ndaj Izraelit për të ndalur operacionin ushtarak në territoret palestineze të pushtuara, për të lejuar ndihmën humanitare dhe për të respektuar ligjin ndërkombëtar dhe atë humanitar.
Ndërkohë, të mërkurën, të paktën 24 palestinezë u vranë nga një seri sulmesh ajrore izraelite në Gaza, në atë që shënon ditën e 600-të të konfliktit të përgjakshëm. /mesazhi
