“Shpresojmë që palët përkatëse të shfrytëzojnë mundësinë për paqe, të kapërcejnë dallimet përmes dialogut dhe të rivendosin paqen në rajonin e Gjirit dhe të Lindjes së Mesme”, tha Ministria e Jashtme e Kinës.
Kina bëri sot thirrje për përmbajtje për të ulur tensionet pasi bombardimet izraelite vranë qindra njerëz në Liban, pavarësisht marrëveshjes së armëpushimit midis SHBA-së dhe Iranit, transmeton Anadolu.
“Pekini u bën thirrje të gjitha palëve të tregojnë përmbajtje për të ndihmuar në uljen e tensioneve në rajon”, tha zëdhënësja e Ministrisë së Jashtme, Mao Ning, për gazetarët në Pekin.
Sulmet ajrore izraelite në Liban vranë të paktën 254 persona të mërkurën dhe sulme të reja herët sot kanë vrarë të paktën 17 persona të tjerë në jug të Libanit.
Libani ka shpallur një ditë zie kombëtare pas vrasjeve për shkak të sulmeve të pandërprera nga Izraeli.
Sulmet vazhdojnë pavarësisht një armëpushimi në luftën SHBA-Izrael kundër Iranit, por Washingtoni pretendon se sulmet izraelite në territorin libanez nuk përfshihen në marrëveshjen dyjavore të armëpushimit të ndërmjetësuar nga Pakistani.
Teherani ka deklaruar se SHBA-ja tashmë ka shkelur tri pika kyç të propozimit me dhjetë pika të Iranit, duke përmendur shkeljen e armëpushimit në Liban, hyrjen e dronëve në hapësirën e tij ajrore dhe mohimin e të drejtës së saj për pasurim të uraniumit.
Lidhur me bisedimet e planifikuara SHBA-Iran në kryeqytetin pakistanez Islamabad këtë fundjavë, Mao tha: “Shpresojmë që palët përkatëse të shfrytëzojnë mundësinë për paqe, të kapërcejnë dallimet përmes dialogut dhe të rivendosin paqen në rajonin e Gjirit dhe të Lindjes së Mesme”.
E pyetur nëse presidenti amerikan Donald Trump ka kërcënuar të vendosë tarifa 50 për qind ndaj vendeve që furnizojnë Iranin me armë, Mao tha: “Qëndrimi i Kinës për tarifat është shumë i qartë dhe nuk ka fitues në një luftë tarifash”.
Ajo shtoi se Kina mbështet përfundimin e shpejtë të armiqësive dhe përdorimin e diplomacisë dhe dialogut për të rivendosur paqen në rajonin më të gjerë të Lindjes së Mesme./anadolu
