Në një intervistë për Agjencinë Telegrafike Shqiptare (ATSH), lideri shpirtëror i bektashinjve, Baba Mondi, ka përsëritur vizionin e tij për krijimin e një mikroshteti fetar brenda territorit të Shqipërisë — një ide që ka shkaktuar reagime të forta dhe polemika të gjera.
“Shteti ynë do të jetë shpirtëror, pa polici, pa ushtri dhe pa taksa,” deklaroi Baba Mondi, duke e paraqitur këtë nismë si një model për paqen dhe tolerancën. Por kjo qasje ka ngritur shqetësime të mëdha mbi sovranitetin dhe unitetin kombëtar, duke e bërë të vështirë të kuptohet se si një zonë e shkëputur nga ligjet dhe institucionet shtetërore mund të funksionojë në mes të kryeqytetit.
Kritikët paralajmërojnë se krijimi i një entiteti të tillë fetar mund të hapë derën për kërkesa të ngjashme nga grupe të tjera, duke rrezikuar stabilitetin dhe duke minuar themelet e shtetit laik shqiptar. Mungesa e taksave dhe strukturave mbrojtëse shtetërore mund ta kthejë këtë zonë në një vakum ligjor, duke ngritur pyetje serioze mbi përgjegjësinë dhe sigurinë e qytetarëve.
Në vend që të promovojë harmoni, një projekt i tillë rrezikon të krijojë ndasi të thella sociale dhe të përçajë shoqërinë shqiptare, që prej kohësh është krenuar për bashkëjetesën ndërfetare. Për shumëkënd, kjo duket më tepër si një manovër për të fituar privilegje të veçanta sesa një përpjekje për të mbrojtur lirinë e besimit.
Në një kohë kur shqiptarët përballen me sfida të shumta ekonomike dhe sociale, shteti duhet të fokusohet në forcimin e institucioneve dhe mbrojtjen e barazisë për të gjithë qytetarët — jo në krijimin e enklavave të veçuara që sfidojnë sovranitetin dhe ligjin.
Paqe dhe dashuri
Rendi Bektashi u themelua në shekullin XIII në Perandorinë Osmane dhe konsiderohet si një degë tolerante, mistike e Islamit e hapur ndaj feve dhe filozofive të tjera.
Disa udhëheqës kryesorë u zhvendosën në Shqipëri pasi u ndaluan në Turqi nga babai themelues i shtetit modern Mustafa Kemal Ataturk në fillim të shekullit XX.
Ndryshe nga besimet më konservatore të Islamit, besimtarët bektashi – burra dhe gra – adhurojnë së bashku dhe konsumimi i alkoolit lejohet, por nuk nxitet.
“Rakia, ashtu si qumështi i nënës, ka përfitime, sepse shkon drejt e në tru pa kaluar nga stomaku”, tha Baba Mondi, duke iu referuar rakisë popullore që është e përhapur gjerësisht në të gjithë Ballkanin.
“Praktika është pjesë e një vizioni të përgjithshëm të tolerancës dhe promovimit të harmonisë që është thelbësore për mendimin bektashian”, sipas Baba Mondit.
“Kudo që janë, bektashinjtë kanë shprehur gjithmonë dashuri, bujari dhe respekt për njerëzit si krijesat më të përsosura në këtë botë”, shtoi ai.
“Ne jemi kundër konflikteve të shkaktuara nga ekstremistët, ne jemi për paqen dhe dashurinë”, tha ai.
Për kryeministrin e Shqipërisë, sigurimi i bektashinjve me qeverinë e tyre ka të bëjë pjesërisht me mbrojtjen e frymës së tolerancës.
“Ne duhet të kujdesemi për këtë thesar që është toleranca fetare, që ta ruajmë dhe promovojmë atë”, tha Rama në një fjalimi në janar, me rastin e 95-vjetorit të transferimit të selisë së shenjtë bektashiane nga Turqia në Shqipëri.
Ai ende nuk ka zbuluar një afat kohor për krijimin e shtetit.
Por, për Baba Mondin dhe ndjekësit e tij sufi, e ardhmja është e mbushur me mundësi.
“Bektashizmi ka qenë dhe do të mbetet një urë lidhëse midis Lindjes dhe Perëndimit”, tha ai.
“Ne kemi qenë gjithmonë një rrugë e mesme në këtë botë për të treguar se mund të jetojmë me dashuri, paqe dhe mirësi”, shtoi Baba Mondi. /gazetaimpakt
